Разидувањето на Фед и ЕЦБ го спушти еврото на петмесечен минимум

Еврото ослабе во однос на доларот и сега има најниска вредност годинава, бидејќи се чини дека Европската централна банка (ЕЦБ) е подготвена да ги намали каматните стапки пред Федералните резерви (Фед) на САД.

Валутата на еврозоната во петокот ослабе за 0,5 отсто, а едно евро купуваше 1,0676 долар, што е најниско од ноември. Тоа е на пат да го постигне најголемиот неделен пад (1,5 отсто) во речиси една година.

Овие движења во областа на валутите дојдоа како резултат на пораките на претставници на ЕЦБ дека макроекономските случувања во САД нема да влијаат во спроведувањето на монетарната политика од другата страна на Атлантикот. За потсетување, американската инфлација забрза во март и го доведе во прашање јунското намалување на стапката на Фед за 0,25 базични поени.

Од друга страна, движењата на пазарите на пари покажуваат дека првото намалување на стапката во САД се очекува во септември. По ова, разликата меѓу приносите на двегодишните американски обврзници и германските должнички записи скокна на највисоко ниво годинава.

„Падот на еврото на 1,07 долар ни кажува дека моментално се смета на намалување на стапката во јуни. Пробивањето на тоа ниво ќе биде важен чекор на патот до 1,05 долар“, рече Бред Бехтел, шеф на валути во „Џефрис“ (Jefferies) во Њујорк. „Еврото најверојатно ќе ја достигне таа вредност кога ЕЦБ ќе почне да ги намалува стапките“, додаде тој.

Трговците со опции се сè попесимисти во однос на еврото, а едномесечните опции за пресврт на ризикот (англ. risk reversal - тактика што ги намалува профитот и ризикот од ненадејни движења на пазарот - нивниот број е добар показател за позиционирање на пазарот н.з.) покажуваат дека бројот на облози за зајакнување на доларот е најголем од октомври.

Од друга страна, априлските податоци на клириншката куќа „Депозитори траст“ (Depository Trust & Clearing Corporation) покажуваат дека учесниците на пазарот не предвидуваат пад на еврото под 1,05 долар.