Пазарите чекаат пад на стапките во САД, доларот блиску до јануарскиот минимум

Доларот не бил толку слаб од август и се приближува до ниското ниво од јануари, бидејќи пазарите сè повеќе веруваат дека Федералните резерви (Фед) неделава би можеле да ги намалат каматните стапки за половина процентен поен.

Според индексот на „Блумберг“ (Bloomberg) што го следи доларот, американската валута ослабна за 0,3 проценти во понеделникот и се приближи до минимумот од август. Понатамошен пад би го донел на јануарскиот минимум. Падот на доларот ги подигна другите светски валути, како јенот, кој постигна највисоко ниво од јули 2023 година.

По неколкунеделни дискусии дали Федералните резерви ќе започнат со ублажување на монетарната политика со намалување на каматите за 25 или 50 базични поени, пазарите сега повеќе веруваат во второто сценарио. Фјучерсите што ги следат одлуките на Федералните резерви покажуваат дека шансите за намалување на каматите за 50 базични поени сега се 58 проценти, додека во петокот шансите беа еднакви.

„Мислиме дека новиот и неизбежен циклус на монетарно попуштање од Федералните резерви е главната пречка за посилен долар“, изјави Родриго Катрил, стратег во банката НАБ (National Australia Bank Ltd). „Доларот ќе слабее како што Федералните резерви ќе ги намалуваат трошоците за задолжување кон неутрална каматна стапка, ако не и под неа“, додаде тој.

Доларот ослабе во однос на повеќето најголеми светски валути во текот на изминатиот месец. Досегашните губитници, како јапонскиот јен и швајцарскиот франк, сега се меѓу најголемите добитници во однос на доларот. Јапонската валута во понеделникот повторно забележа раст, па еден долар одново купуваше помалку од 140 јени, бидејќи инвеститорите се обложуваа на намалување на каматните разлики меѓу двете земји.

Со оглед на тоа што официјалните претставници на Фед не смеат да даваат изјави пред состанокот на 18 септември, пазарите немаат многу податоци на располагање врз чија основа би можеле да ги формираат своите очекувања. Еден од извештаите што ќе им дадат појасна слика за состојбата на економијата би можел да биде извештајот за малопродажбата што ќе биде објавен во вторник.

Техничката анализа покажува дека доларот се приближува до таканареченото „ниво на поддршка“ иако валутата е на надолна траекторија.

„Иако постојат шанси Федералните резерви да решат да ги намалат каматите најмногу на самиот почеток на процесот на монетарно попуштање, мислиме дека пазарот го преценува овој ризик и дека Фед неделава ќе ги намали стапките за 25 базични поени, што би му помогнало на доларот да зајакне“, рече Дејвид Форестер, стратег во банката „Кредит Агрикол“ (Credit Agricole CIB) во Сингапур.

Повеќето аналитичари сепак очекуваат дека доларот ќе слабее. До ова време следната година, во однос на доларот ќе зајакнат и еврото и канадскиот долар и јенот и австралискиот долар, покажува анкета спроведена од „Блумберг“ меѓу аналитичарите.

„И неочекувано попустливите Федерални резерви би можеле да го ослабат доларот“, напиша Боб Севиџ, главен стратег за пазари во банката БНЈ (BNY). Тоа би можело „да ги измени проекциите за инфлацијата во повеќе земји (како Британија) што увезуваат суровини поврзани со доларот и да ја поттикне централната банка на Норвешка да ја зајакне домашната валута, која е поврзана со нафтата“, додаде тој.