Вредноста на доларот продолжува да расте

Доларот порасна во однос на секоја поголема валута минатата недела бидејќи загриженоста околу одлуката на ФЕД и потенцијалната рецесија ја зголемува побарувачката за сигурни инвестициски инструменти. Еврото падна под паритетот спрема американскиот долар и изгледа дека трендот ќе продолжи уште некое време.

„Доларот останува во облик на насмеан емотикон“, напиша Вин Тин, директор за стратегија во тргувањето со валути на банката Браун Брадрс Херман енд Ко. (Brown Brothers Harriman & Co), говорејќи за јакнењето на доларот.

Има голем број потенцијални двигатели за уште поголем раст на американската валута. На пример, можноста да ослабнат валутите на некои од поголемите земји, како на пример јапонскиот јен, кој што важи за сигурна валута, или заедничката европска валута.

Според песимистичките прогнози за еврото на ЈП Морган Чејс енд Ко (JP Morgan Chase & Co), европската валута до декември ќе падне на 0,95 долари. Инвестициската банка РБЦ Капитал Маркетс (RBC Capital Markets) предвидува дека фунтата ќе падне за повеќе од 5 отсто до крајот на годинава, на 1,11 долари, додека австралиската Комонвелт (Commonwealth) банка очекува дека австралискиот долар ќе ја заврши годината со пад на 65 американски центи.

Австралиската Комонвелт банка очекува дека неделава еврото главно ќе биде под паритетот во однос на доларот. 

Удар на пазарот

Големиот раст на доларот ја зголемува штетата на пазарот за валутите во развој, чии централни банки користат над 2 милијарди странски резерви секој работен ден за да ја зајакнат валутата.

Резервите на Индија, Тајланд и Јужна Кореја ослабеа за вкупно 115 милијарди само оваа година. Кинеската валута, која што многумина ја сметаат за „сидро“ на расположението на инвеститорите, се движи кон нивото од 7 јуани за долар, најмногу поради рестрикциите во таа држава и забавувањето на економскиот раст. 

Како што се зголемува разликата на приносите меѓу краткорочните и долгорочните американски државни обврзници, што за инвеститорите е можен индикатор за рецесија, така со речиси исто темпо паѓа вредноста на валутите во развој, како што се унгарската форинта, бразилскиот реал и мексиканскиот пезос.

„Комбинацијата на високи каматни стапки и јакнење на американскиот долар предизвикува дополнителен притисок кај инвеститорите“, изјави Алвин Тен, стратег во банката РБЦ Капитал Маркетс (RBC Capital Markets) во Сингапур, кој очекува дека доларот веројатно ќе продолжи да зајакнува дури и во почетокот од следната година.