Лагард: Време е за глобално евро, потребна е решителност

Претседателката на Европската централна банка, Кристин Лагард, ги повика креаторите на политиките да ја искористат моменталната ситуација и да го зголемат глобалниот профил на еврото, бидејќи политиките на Доналд Трамп ја поткопуваат довербата во американскиот долар.

„Овој момент на промена е можност за Европа: ова е момент за ’глобално евро‘“, напиша таа во своја колумна за „Фајненшл тајмс“ објавена во вторникот. „За да ја искористиме оваа можност и да ја зајакнеме улогата на еврото во меѓународниот монетарен систем, мораме да делуваме одлучно како обединета Европа, преземајќи поголема контрола врз сопствената судбина“.

Повторувајќи ги своите претходни изјави, Лагард нагласи дека „Европа мора да ги зајакне трите основни столба: геополитичка кредибилност, економска отпорност и правиот и институционален интегритет“.

Европските креатори на политики, вклучително и Лагард, гледаат можност да ја оспорат децениската доминација на доларот и да ја зајакнат улогата на еврото, овозможувајќи му на валутниот блок да ужива повеќе од привилегиите кои досега му припаѓаа на доларот – како што се пониски трошоци за задолжување за владите и компаниите, и економија поотпорна на девизни флуктуации.

Bloomberg

Инвеститорите масовно го напуштаат американскиот долар оваа година поради непредвидливите политики на претседателот Трамп, особено во однос на трговијата. Дополнително, инвеститорите покажуваат зголемен интерес за Европа, особено поради насоката кон зголемена јавна потрошувачка, вклучително и во Германија. Истовремено, властите се претпазливи во однос на нагла промена од доларот, која би можела да ја загрози стабилноста на глобалниот финансиски систем.

Сепак, неодамнешен извештај на ЕЦБ покажа дека меѓународната употреба на еврото останала на исто ниво и во 2024 година, што ја открива длабочината на предизвикот да му конкурира на доларот на глобалната сцена.

Во својата колумна, Лагард нагласи дека „ваквиот чекор кон поголемо меѓународно влијание на нашата валута нема да се случи автоматски – тоа мора да се заслужи“.

„Како и во претходните периоди, загриженоста за доминантната валута сè уште не предизвикува големо пренасочување кон алтернативи“, додаде таа. „Наместо тоа, тоа се одразува во зголемената побарувачка за злато“.

Таа исто така потенцираше дека меѓународната резервна валута „доаѓа со одговорности“.

„За да се избегне недостиг од евро ликвидност во странство, ЕЦБ обезбедува своп и репо линии за клучни партнери со цел да го обезбеди непреченото спроведување на својата монетарна политика“, напиша таа.

Лагард повторно повика на поголема употреба на квалификувано мнозинство при гласање за клучни области и на поголем заеднички долг на ЕУ.

„Заедничкото финансирање на јавни добра, како што е одбраната, би можело да создаде повеќе сигурни средства“, рече таа.