Кинеската побарувачка за ЛНГ ќе остане пониска по турбуленциите на Блискиот Исток

Надежите за силен раст на кинеската побарувачка за течен природен гас бледнеат, и покрај примирјето на Блискиот Исток, бидејќи аналитичарите предупредуваат на продолжени ризици во снабдувањето и повисоки цени.

Кинескиот увоз на ЛНГ минатата година падна за 11 отсто, на 68,4 милиони тони — редок пад по скоро две децении речиси непрекинат раст. „Блумберг НЕФ“ (BloombergNEF) очекува ново намалување во 2026 година, на 62,3 милиони тони, додека „Ристад Енерџи“ (Rystad Energy) предвидува благо зголемување на околу 70 милиони тони.

И пред американско-израелските напади врз Иран, кои го нарушија синџирот на снабдување од Персискиот Залив, кинеската побарувачка за гас веќе опаѓаше поради забавувањето на економијата. Очигледната потрошувачка се намали за 0,9 отсто во првите два месеци од годината, според владините податоци, продолжувајќи го слабиот тренд што траеше и во текот на 2025 година.

Кинескиот увоз на ЛНГ ќе опадне во 2026 поради војната со Иран
Конфликтот на Блискиот Исток ги наруши испораките и ги зголеми цените

Bloomberg

Прогнозата на „Блумберг НЕФ“, која не е променета по примирјето, претпоставува дека испораките од Катар преку Ормускиот теснец ќе продолжат од крајот на април. И прогнозата на „Ристад Енерџи“ (Rystad Energy) останува непроменета и предвидува обновување од средината на месецот.

Но повторното отворање на овој клучен воден пат нема да ја надомести долгорочната штета предизвикана од иранските напади врз катарските капацитети. Исто така, нема да ги намали стравувањата дека теснецот може во секое време да биде искористен како средство за притисок врз глобалното снабдување со нафта и гас.

Кина, најголемиот увозник на гас во светот, добиваше околу една четвртина од својот ЛНГ од Катар, кој сега се соочува со повеќегодишен процес на обнова. Особено значајно е уништувањето на два производни блока за ЛНГ во најголемиот извозен терминал во светот, што според „Блумберг НЕФ“ може да одземе 12,5 милиони тони годишен капацитет во следните три до пет години.

Зависноста од Катар го притиска ЛНГ пазарот

Соочена со таков недостиг, Кина речиси сигурно ќе го намали своето изложување кон Персискиот Залив. Со оглед на клучната улога на Катар на пазарот, тоа може да значи и намалување на увозот на ЛНГ, со поголемо потпирање на домашното производство и гасоводите од Русија и Централна Азија. Веројатно ќе се фаворизираат и алтернативи како јаглен и обновливи извори, кои Кина ги има во изобилство.

Кина веќе покажува отпорност на нарушувањата благодарение на диверзифицираните извори надвор од Персискиот Залив, изјави аналитичарката на „Ристад Енерџи“, Шјионг Веи. Тие договори се доволни да го ублажат ударот во период од четири месеци. Потоа, земјата би можела да се сврти кон САД за дополнителни испораки, иако тие се оптоварени со царини, додаде таа.

Азискиот бенчмарк за спот ЛНГ фјучерси речиси се удвои во март, достигнувајќи околу 20 долари за милион британски термални единици (мбте). Еквивалентниот пазар во Кина, кој се натпреварува со домашниот и копнениот гас, порасна за 44 отсто, на околу 15 долари за мбте.

Во меѓувреме, Кина веќе воведе мерки за справување со ситуацијата во целата економија. Индустриите зависни од увоз на нафта и гас го намалија производството, крајбрежните електрани ја ограничуваат употребата на гас, а увозниците ги ограничуваат малопродажните цени, што дополнително го става поскапиот ЛНГ во понеповолна позиција.

„Со значително поголем потенцијал за раст на цените во споредба со минатата година, користењето на гас за производство на електрична енергија би можело дополнително да се намали“, изјави Шјионг.