Цените на природниот гас во Европа во слободен пад

Цените на природниот гас во Европа паѓаат веќе пет дена по ред поради прогнозите дека температурите ќе останат „благи“ до новата година, а залихите на ова гориво се‘ уште се обилни.

Референтните фјучерси се намалија за дури 7 проценти, откако во средата паднаа на најниско ниво од средината на јуни. Цените се намалуваат во текот на изминатите две недели бидејќи топлото и ветровито време ја намалува побарувачката за гас. Индустриската потрошувачка, којашто е веќе ограничена со високите цени од почетокот на годината, вообичаено се намалува за време на празничната сезона.

Испораките на течен природен гас, исто така, остануваат силни. Пловечките терминали се упатени кон северозападна Европа, а Германија веќе почна со увоз од два нови терминали. Ваквата пазарна ситуација ублажува дел од грижите на креаторите на политиките по тешката година во која цените на енергијата ги загрозија економиите и помогнаа инфлацијата да се доведе до највисоко ниво во последните децении.

„Без голема промена во благото и ветровито време за паузата од крајот на годината и продолжувањето на силниот увоз на ЛНГ, европските цени веројатно ќе останат под надолен притисок денес“, велат од „Енерџи Скен“(EnergyScan), платформата за анализа на „Енџи“ (Engie SA.).

Сепак, трговците го следат пазарот за какви било знаци за промена на протокот на гас бидејќи разликата во цените меѓу Европа и Азија останува тесна. Во моментов, американските извозници на ЛНГ сметаат дека е подеднакво профитабилно да продаваат на двата региона во февруари, додека во март профитот на европскиот пазар би бил поголем, според „Блумберг НЕФ“ (BloombergNEF).

Кога станува збор за можното затегнување на пазарот во Азија,„Шел“ (Shell Plc) привремено го прекина производството во пловечкиот капацитет за ЛНГ „Прелуд“ (Prelude) во близина на западниот брег на Австралија откако изби пожар.

Холандските предмесечни фјучерси, репер за гас во Европа, беа за 6 проценти пониски на 91,90 евра за мегават-час вчера во Амстердам. Еквивалентот на Обединетото Кралство падна за дури 7,3 проценти.

Цените на струјата во Европа паднаа заедно со цената на гасот. Во Германија цената за наредната година падна за дури 5,3 проценти до 254 евра за мегават-час, што е најниско ниво од крајот на јуни.

„Притисокот со кој се соочи Европа пред две недели со ниската температура се чини дека помина и ризикот се отстранува од краткорочните цени“, велат во белешката аналитичарите на „СЕФЕ Енерџи“ (SEFE Energy Ltd).

„Ликвидноста останува слаба додека трговците избегнуваат преземање нови договори за време на празничната пауза“.