text size
Директорот на ЕСМ, Васко Ковачевски, тврди дека струја ќе има доволно и дека рестрикции не се опција. Тој во разговор за Блумберг Адрија ТВ вели дека производството е стабилно, а кратките прекини се однесуваат само на редовни ремонти поради застареноста на капацитетите.
„ЕСМ интензивно се подготвува да испорача доволно електрична енергија и оваа зима, како и минатата, а и доволно топлинска енергија во градот Скопје. Затоа се ставени во функција речиси сите државни капацитети за производство на електрична енергија и, дополнително, исто така е ангажирана и гасната електроцентрала ТЕ-ТО, која е во приватна сопственост. Во овој момент работиме со термоцентралата во Битола, термоцентралата Осломеј, со максимален капацитет е ставена во функција ТЕЦ Неготино, која произведува електрична енергија од мазут. Исто така и когенеративните електроцентрали на гас што се стационирани во градот Скопје и со максимален капацитет работи и целокупниот хидропотенцијал со кој располага АД ЕСМ“, вели Васко Ковачевски, директор на ЕСМ.
„За нас, и за ЕСМ и за Владата, рестрикции не се опција. Тоа значи дека ги обезбедуваме максимално потребните дневни количества, првенствено за домаќинствата и за малите потрошувачи. На крајот од годината ќе произведеме 27 проценти повеќе струја во однос на претходната година со сите вклучени капацитети“, додава Ковачевски.
Во врска со обвинувањата дека ЕСМ фаворизира бугарска фирма за испорака на гасот, Ковачевски смета дека се неосновани и не водат кон решавање на енергетската криза.
„Обвинувањата од страна на АД ’Макпетрол’ ги сметам за неосновани, затоа што АД ЕСМ има отворена, транспарентна и конкурентна постапка за набавка на енергенти за производство на топлинска енергија и тие, како и сите компании од државата и надвор од неа, може да достават понуда за обезбедување на количествата и квалитетот на гасот со сите дополнителни параметри, а цената ќе биде пресудна“, вели Васко Ковачевски, директор на АД ЕСМ.
Целиот разговор на директорот на ЕСМ за Блумберг Адрија ТВ погледнете го во видеото.
.webp){kind=icon}
