text size
Клучниот кабел за напојување што ги поврзува Велика Британија и Франција се употребува во полн капацитет за првпат по пожарот, поради кој во 2021 година беше затворен. Враќањето на кабелот е благодат за снабдувањето со електрична енергија на земјите во средината на зимата, иако во сезоната досега има релативно благи временски услови и ограничувањата на побарувачката го намалија притисокот врз мрежите.
Во најтешките денови европските електроенергетски системи доживеаја голем скок на цените, а сега со балансираните цени, како и намалувањето на побарувачката од домаќинствата, ја ублажуваат состојбата.
Интерконекторот ИФА-1 (IFA-1) увезе околу 2.000 мегавати во саботата, а утрово извезе приближно исто толку, покажуваат податоците на „Блумберг“. Пожарот во станицата во Кент, југоисточна Англија, ја прекина работата на кабелот во септември 2021 година, токму кога цените на гасот и електричната енергија почнаа да растат во раните фази на енергетската криза во Европа. Заедно со ИФА-2 (IFA-2), кабелот е клучно средство за испраќање и примање струја меѓу Франција и Британија, често помагајќи им на компаниите да продаваат електрична енергија по повисоки цени отколку на нивните домашни пазари.
Пренос на струја преку ИФА-1 од Франција за Велика Британија / Bloomberg Mercury
Велика Британија стана нето-извозник на електрична енергија за првпат минатата година, откако долгите прекини на француската нуклеарна флота ги зголемија потребите за увоз таму. Дури и со делумно исклучување на кабелот, Велика Британија и нејзините соседи разменија рекордни количества енергија во јануари, покажуваат податоците од британскиот мрежен оператор. Околу 2,6 терават-часа се пренесени преку петте подморски кабли на „Нешнал грид“ (National Grid Plc) досега оваа година, што е за околу 12 проценти повеќе од истиот период лани.
.webp){kind=icon}
