Франција со рекорден извоз на електрична енергија

Извозот на електрична енергија од Франција достигна рекордно ниво во првата половина од 2026 година, бидејќи закрепнувањето на производството од нуклеарните централи и растот на производството од обновливи извори ѝ обезбедија на земјата голем вишок евтина електрична енергија за продажба низ Европа.

Нето-извозот на електрична енергија достигна 51 терават-час, што е за 36 отсто повеќе во споредба со првата половина од 2025 година и за 19 отсто над претходниот рекорд за прво полугодие поставен во 2024 година, се наведува во извештајот на операторот на електропреносната мрежа „РТЕ“ (RTE), објавен во четвртокот. Растот беше поттикнат од зголемување на производството на електрична енергија за 4,6 отсто, додека домашната побарувачка остана главно непроменета.

Големиот француски парк нуклеарни централи, кој најмногу придонесе за зголемувањето на производството, помогна домашните цени на електричната енергија да останат заштитени од растот на светските цени на природниот гас по конфликтот во Персискиот Залив. Просечната цена на француските термински договори за испорака на електрична енергија во 2027 година изнесуваше 54 евра (62 долари) за мегават-час, во споредба со 89 евра во Германија и 101 евро во Италија, што дополнително ја зацврсти конкурентноста на француската електрична енергија на соседните пазари.

Рекордниот француски извоз на електрична енергија се прелеа низ Европа

Нето-извозот на електрична енергија достигна рекордни 51 терават-час во првата половина од 2026 година

Забелешка: Шпанија беше единствената земја од која Франција беше нето-увозник, со увоз од еден терават-час електрична енергија/Извор: RTE

Вредноста на извозот достигна рекордни три милијарди евра во првата половина од годината, што е за 600 милиони евра повеќе отколку една година претходно.

Изобилството на производство со ниски емисии на јаглерод придонесе 95 отсто од француското производство на електрична енергија да потекнува од декарбонизирани извори, што е највисок удел забележан во едно прво полугодие. Големиот вишок производство доведе до 407 часа со негативни цени на струјата, односно околу 10 отсто од првото полугодие. Цената падна на рекордни минус 498 евра за мегават-час, што ја нагласува сè поголемата тешкотија во усогласувањето на производството со побарувачката.