Македонија ја очекува тешка зима

Следната зима ќе биде тешка не само за Македонија, туку и за регионот и глобално, вели министерот за економија Крешник Бектеши. Сепак, тој уверува дека во земјава ќе има доволно струја и нема да има рестрикции.

– Се прават сите подготовки посебно од страна на ЕСМ за да го зголеми производството и согласно нивниот доставен  план веќе е зголемено производството. Во однос на цените најголемиот товар ќе падне на тие што грејат базени, кои имаат можност да ги плаќаат сметките, што трошат колку што трошат 100 просечни домаќинства во државата месечно. Во делот на просечните граѓани, оние кои трошат просечно согласно сите параметри и нивните потреби, за нив можеби ќе има и помали сметки со воведување на блок тарифите. Секако дека сите треба да бидеме свесни и посветени да се обидеме да заштедиме што повеќе елетрична енергија зашто ова не е криза само на Северна Македонија, ова е глобална криза, истакна Бектеши.

Од утре во земјава поскапува струјата за 7,4 отсто. Според Регулаторната Комисија за енергетика поскапувањето ќе изнесува олку за 98.8 отсто од потрошувачите. Останатите кои трошат многу, ќе плаќаат многу. Од утре стартува и новиот модел на тарифирање во блок тарифи со цел рационално трошење на струјата. Ќе постојат четири тарифни блокови. Првиот ќе се донесува на домаќинствата кои трошат до 210 киловат часови, вториот до 630, третиот до 1.050, а четвриот над 1.050 киловатчасови. Блок тарифите се однесуваат само на дневната, така наречена скапа струја. За евтината струја после 22 часот и во недела блок тарифите нема да важат.