text size
Договорот за извоз на жито од Украина заврши по речиси една година, откако Русија ја раскина спогодбата, зголемувајќи ја неизвесноста околу глобалните резерви на храна и тензиите во регионот.
Москва постојано се закануваше дека ќе го напушти договорот, но последен пат се согласи на двомесечно продолжување во мај, кое траеше до 17 јули. Затворањето на коридорот ќе ги погоди клучните купувачи како Кина, Шпанија и Египет.
„Аранжманите престанаа да важат денеска“, рече портпаролот на Кремљ, а пренесе руската новинска агенција „Тасс“. „За жал, делот што ја засега Русија во овој црноморски договор досега не беше исполнет, затоа тој е прекинат“.
Овој потег ја загрозува клучната трговска маршрута од Украина, еден од главните светски извозници на жито и растително масло, токму кога започнува следната жетва. Истиот тој доаѓа и откако Русија во понеделникот соопшти дека украински беспилотни летала оштетиле клучен мост кон Крим.
Прочитајте повеќе: Русија го затвори мостот на Крим откако прогласи „вонредна состојба“
Русија ги извести Турција и Обединетите нации - кои посредуваа во договорот - дека нема да го продолжи, објави „Интерфакс“. Москва соопшти дека ќе се врати на договорот откако ќе се исполнат нејзините услови.
Портпаролот на ОН за црноморската иницијатива за жито немаше веднаш коментар. Претседателскиот кабинет на Украина исто така не коментираше веднаш.
Референтните фјучерси на пченицата во Чикаго пораснаа дури за 4,2 отсто.
Пактот обезбеди безбедно поминување на речиси 33 милиони тони житни култури преку Црно Море откако беше потпишан во јули 2022 година, што овозможи олабавување на светските цени на прехранбените производи, во однос на рекордните нивоа што беа достигнати по инвазијата на Русија.
Сепак, коридорот се соочуваше со повеќекратни прекини во последниве месеци и е речиси празен, што го ублажува непосредниот прекин кон светските текови на земјоделските култури. Поголемиот ризик е на подолг рок, бидејќи разнишаната и скапа извозна логистика може да ги поттикне украинските земјоделци дополнително да ги намалат жетвите, кои веќе и онака се намалени под тежината на војната.
.webp){kind=icon}
