Русија станува најголемиот снабдувач на злато за Емиратите

Минатата година Русија стана главен снабдувач на злато на Обединетите Арапски Емирати (ОАЕ) откако западните земји воведоа санкции за увозот на злато од земјата.

ОАЕ лани увезле 96,4 тони злато од Русија, повеќе од која било друга земја, според базата на податоци „Комтрејд“ (Comtrade) на Обединетите нации. Ова е приближно една третина од годишното производство на злато во Русија и 15 пати поголема количина на злато увезено во ОАЕ од Русија во споредба со претходната година, што може да се види на следниот графикон.

Bloomberg

ОАЕ долго време беа клучен центар за благородни метали, особено од Африка и Индија, но минатата година за првпат одиграа голема улога во руската трговија со злато. Пред војната, речиси сите руска прачки беа испорачувани во Лондон, најголемиот пазар во светот, но набрзо транспортот стана табу меѓу банките што се занимаваат со дејноста.

Западните санкции ги нарушија вообичаените извозни рути на Русија, принудувајќи ги рударите во земјата да најдат нови начини да го продаваат металот. Малку познати трговци во Дубаи, Истанбул и Хонгконг ја презедоа трговијата, објави „Блумберг“ претходно оваа година.

Други клучни добавувачи на злато за ОАЕ минатата година беа Мали и Гана, кои испорачаа 95,7 тони и 81 тон, соодветно. Швајцарија беше главната дестинација за извозот на злато на арапската нација, преземајќи 145 тони.