.webp){kind=icon}
Русија месецов ќе го задржи намалувањето на извозот на сурова нафта од 300.000 барели дневно и ги потврди плановите да го задржи евентуално и до крајот на годината.
„Доброволното намалување е со цел да ги зајакне превентивните напори на земјите од ОПЕК+ за поддршка на стабилноста и рамнотежата на нафтениот пазар“, рече рускиот вицепремиер Александар Новак во изјава во средата.
Русија и Саудиска Арабија веќе неколку месеци прават дополнителни доброволни намалувања на снабдувањето, надвор од оние што се бараат со договорот од ОПЕК+. Ријад од јули го намалува своето производство за дополнителни милиони барели дневно, што придонесе за 20 отсто зголемување на цената на суровата нафта, на над 90 долари за барел во Лондон.
Двете земји ветија дека ќе ги ревидираат своите нафтени политики секој месец, а руското соопштение од средата доаѓа само неколку часа пред министрите од Организацијата на земјите извознички на нафта и нејзините сојузници да се соберат да разговараат за нафтениот пазар.
Според Новак, Русија повторно ќе ги прегледа резервите на нафта следниот месец „за да размисли за продлабочување на намалувањата или зголемување на производството“, во зависност од ситуацијата на пазарот.
Саудијците засега ќе се држат до еден милион барели
И Саудиска Арабија ги потврди претходните планови за намалување на производството на нафта за еден милион барели дневно до крајот на годината.
Целта на оваа мерка е да се „зајакнат превентивните напори направени од земјите на ОПЕК+ за да се поддржат стабилноста и рамнотежата на нафтениот пазар“, се наведува во соопштението за саудиската новинска агенција.
Како што може да се согледа, најавите на Москва и Ријад за продолжување на намалувањето на производството на нафта се исти.
