Како што се зголемуваат тензиите на Блискиот Исток меѓу САД и Иран, така цената на нафтата расте, оживувајќи ја загриженоста на инвеститорите дека војната меѓу Израел и Хамас може да предизвика поширок конфликт и да го наруши снабдувањето со сурова нафта.
Цената на Брент нафтата се искачи на над 89 долари за барел за да ги намали неделните загуби, додека американската нафта (West Texas Intermediate) се искачи на над 84 долари. Во најновиот развој на настаните, американската војска нападна два објекти поврзани со Иран во Сирија, откако Пентагон најави распоредување на дополнителен воен персонал во регионот. Претходно, Техеран најави дека САД нема да останат непогодени доколку конфликтот се прошири. Поскапувањето на суровата нафта уследи откако беше објавено за нападите во Сирија.
Bloomberg Mercury
Цената на нафтата беше потресена од нападот на Хамас врз Израел на 7 октомври, првично растејќи поради стравувањата од поширок конфликт, но потоа ги намали тие добивки бидејќи војната остана ограничена и се појави загриженост поради можноста за послаба физичка побарувачка. Сепак, индициите дека Израел ќе започне копнена инвазија на Појасот Газа ќе ги одржи високите тензии во регионот, од каде доаѓа околу една третина од глобалното снабдување со сурова нафта.
„Ова беше тешка недела за цените на нафтата “, рече Чару Чанана, пазарен стратег во „Саксо Капитал Маркетс“. „Меѓутоа, загриженоста за побарувачката веројатно дополнително ќе порасне бидејќи американските потрошувачи снемуваат заштеди и загриженоста за рецесија ескалира“.
Глобалните берзи паднаа оваа недела, додека доларот е блиску до највисокото ниво од ноември, што ги зголеми цените на суровините за повеќето купувачи.
Хамас - прогласен за терористичка група од САД и Европската унија - е поддржан од Иран, кој исто така го поддржува Хезболах во јужен Либан. Пред американските напади врз цели во Сирија, САД објавија зголемување на нападите со беспилотни летала, за што ги обвинија локалните милитантни групи поддржани од Техеран.
.webp){kind=icon}
