Златото скокна на највисоко ниво на сите времиња, бидејќи шпекулациите за пресврт во политиката на Федералните резерви (Фед) и геополитичките ризици го поддржаа растот на благородниот метал.
Златната прачка поскапе дури за 1,3 отсто, до 2.141,79 долари за унца, пред да ги намали своите добивки. Тоа го надмина претходниот рекорд од 2.135,39 долари, кој беше поставен на 4 декември минатата година.
Златото додаде околу 100 долари во последните пет сесии, поттикнато од комбинацијата на очекувањата за монетарно олеснување, геополитичките тензии и ризикот од повлекување на пазарите на акции. Обемот на ваквото придвижување изненади некои набљудувачи на пазарот, кои велат дека можеби делумно е поттикнат од моментумот.
„Зголемениот ризик од корекции на берзите - означен со слабите податоци за американското производство во петокот - може да убеди некои инвеститори да се префрлат од акции на злато“, вели Оле Хансен, стратег за стоки во „Саксо“ (Saxo Bank A/S).
Bloomberg
Иако и натаму е неизвесно кога Банката на федерални резерви ќе направи пресврт во монетарната политика, знаците дека тој потег се приближува го поддржуваат златото од средината на февруари. Пазарите покажуваат речиси 60 отсто шанса за намалување на стапката во јуни. Пониските трошоци за задолжување обично се позитивни за благородниот метал, кој не носи никакви камати.
Неодамнешниот раст исто така ја истакна зголемената неусогласеност помеѓу цените на самото место и одливите од фондовите со кои се тргува на берза (ЕТФ), фокусирани на злато. Позициите во „СПДР голд шерс“ (SPDR Gold Shares), најголемиот таков ЕТФ во светот, паднаа за 0,3 отсто во понеделникот, со што вкупниот износ е најнизок од јули 2019 година, според податоците собрани од „Блумберг“.
Тие одливи делумно се неутрализирани со постојаната побарувачка за благородниот метал од страна на централните банки, што помогна да се одржат цените покачени дури и кога реалните каматни стапки се зголемија минатата година. Златото беше поддржано и во текот на кинеската Нова година, бидејќи тамошните потрошувачи во него гледаа заштита од превирањата на берзата и имотниот сектор во земјата.
.webp){kind=icon}
