Златото достигна нова рекордна цена во услови на геополитички и економски тензии, вклучувајќи ги и подготовките на Израел за напад од Иран или неговите сојузници, a инвеститорите ги анализираат економските показатели од СAД.
Цената на златото порасна за еден процент, на 2.395,48, во почетокот на тргувањето во Азија. Израел се подготвува да го нападне Иран во следните два дена како одговор на нападот врз дипломатската мисија на Иран во Сирија минатата недела, објави „Волстрит журнал“ (Wall street journal), цитирајќи лице запознаено со плановите.
Скокот на цената на златото беше малку разнишан по објавувањето на податоците за американската инфлација во средата, која беше побрза од очекувањата на аналитичарите. Од друга страна, неделниот раст на цените продолжи четврта последователна недела, што е најдолга низа од минатиот јануари.
Геополитичките тензии на Блискиот Исток и војната во Украина, како и побарувачката за злато од централните банки, особено централната банка на Кина, придонесоа за зголемување на цената.
Податоците објавени во четвртокот покажаа дека цените на производителите во март пораснале најмногу во претходните 11 месеци. Сепак, извештајот исто така покажа дека растот на цените е забавен во некои категории што се вклучени во омилената мерка за инфлација на Фед. Тоа помогна да се ублажат стравувањата од повторно забрзување на растот на цените, кои повторно се појавија по неколку извештаи што покажаа дека американската економија останала еластична.
Во 10.25 часот во Сингапур цената на златото беше 2.391,35 за унца, што значи дека од почетокот на неделата цената на овој благороден метал скокна за 2,6 отсто. Индексот на „Блумберг“ што го следи американскиот долар не забележа големи промени. Среброто достигна тригодишен рекорд, а скокнаа и цените на платината и на паладиумот.
.webp){kind=icon}
