Пораката од Фед и колебливоста на јенот му даваат поттик на златото

Златото порасна бидејќи Федералните резерви (Фeд), спротивно на очекувањата, ги намалија шансите за зголемување на каматните стапки, а се шпекулираше и дека јапонските власти интервенираат на јенот, што му наштети на доларот.

Во почетокот на азиското тргување, златото поскапе до 2.330 долари за унца, откако претходната сесија ја заврши со раст од 1,5 отсто, што е негова најголема еднодневна добивка од средината на април.

Приносите на американските обврзници се намалија во средата - давајќи му ветер в грб на златото - откако претседателот на Фед, Џером Пауел, рече дека има помали шанси за зголемување на каматните стапки. Сепак, тој повторно ја нагласи потребата од повеќе докази дека цените се „ладат“, пред да се донесе одлука за намалување на трошоците за задолжување.

На глобалните валутни пазари, јапонскиот јен зајакна повеќе од три отсто во однос на доларот, поттикнувајќи ги шпекулациите дека јапонските власти сепак интервенирале - по вторпат неделава - за да ја поддржат валутата.

Показателот што ја мери вредноста на доларот падна, што го направи златото попривлечно за повеќето купувачи. Благородниот метал порасна за околу 13 отсто годинава, достигнувајќи рекордно високо ниво минатиот месец, иако временската рамка на Фед за намалување на каматните стапки е поместена.

Растот забележан во изминатите два месеца е поврзан со силните набавки од страна на централните банки, побарувачката од азиските пазари - особено од Кина - но и со конфликтите во Украина и на Блискиот Исток.

Цената на спот злато скокна за 0,3 отсто, на 2.326,03 долари за унца, во 9.07 часот во Сингапур, додека среброто поскапе на 27 долари за унца. Индексот за доларот на „Блумберг“ падна за 0,3 отсто, а паладиумот се тргуваше под платината во средата, бидејќи неговата долгорочна премија беше намалена од песимистичките изгледи за побарувачката на бензин.