text size
Берзанскиот раст на Волстрит се пренесе во Азија, бидејќи натамошниот пад на цените на нафтата го засили оптимизмот дека инфлацијата ќе биде ставена под контрола. Јенот ослабе откако Банката на Јапонија ги зголеми каматните стапки со поделено гласање.
Индексот на азиските акции MSCI порасна за 0,8 отсто, откако индексите S&P 500 и Nasdaq 100 го забележаа својот најдобар ден од почетокот на август. „Самсунг“ (Samsung Electronics Co.), „СК Хајникс“ (SK Hynix Inc.) и други регионални производители на чипови забележаа раст по оптимистичката перспектива од „Енвидија“ (Nvidia Corp). Фјучерсите на американските берзански индекси укажуваа на дополнителни добивки на Волстрит, додека европските акции беа подготвени за малку послабо отворање.
Во меѓувреме јенот падна на околу 157,20 за долар, откако централната банка во петокот ја зголеми својата референтна каматна стапка за четвртина процентен поен, на 1,25 отсто. Иако потегот беше предвиден од сите економисти анкетирани од „Блумберг“, одлуката беше донесена со двајца членови на одборот што гласаа против. Вниманието сега се пренасочува кон прес-конференцијата на гувернерот Казуо Уеда.
Дополнително на позитивниот тон, суровата нафта брент падна за 1,2 отсто, на околу 103,50 долари за барел, намалувајќи се трет ден по ред, бидејќи загриженоста околу снабдувањето се намали, а трговците го насочија вниманието кон следниот круг дипломатски напори во врска со војната меѓу САД и Иран.
Пониските цени на енергијата би можеле да го намалат притисокот врз потрошувачките цени и да им дадат на централните банки повеќе простор да го проценат влијанието на построгата монетарна политика, обезбедувајќи поддршка и за акциите и за обврзниците. Но трајноста на тоа олеснување може да зависи од тоа дали нафтата ќе продолжи да поевтинува, при што војната меѓу САД и Иран и изгледите за понатамошна дипломатија ја одржуваат неизвесна перспективата за снабдувањето со енергенти.
„Со оглед на тоа што политиката на централните банки сè уште ги движи пазарите, а геополитичките ризици остануваат високи, треба да има многу можности за волатилност пред да заврши неделата“, напиша Ник Твајдејл, главен пазарен аналитичар во АТГМ (AT Global Markets) во Сиднеј.
Што велат стратезите на „Блумберг“...
„Јенот се соочува со дополнителни падови откако гласовите против одлуката на Банката на Јапонија за каматните стапки ги згаснаа очекувањата за последователни зголемувања, надвор од широко очекуваното покачување од 25 базични поени на 1,25 отсто.“
- Андре де Силва, стратег во „Маркетс лајв“.
Фокусот во Азија беше на јенот откако Банката на Јапонија го следеше Фед и ги зголеми каматните стапки.
Стратезите велат дека курсот долар-јен би можел да се искачи кон 160 ако инвеститорите заклучат дека патеката на затегнување на јапонската банка ќе има тешкотии да го следи Фед. Ризикот е особено изразен ако денешната одлука или последователната комуникација се протолкува како попустлива, имајќи предвид дека зголемувањето од четвртина поен веќе во голема мера беше вградено во пазарните очекувања.
Во другите делови на пазарот, американските државни обврзници главно ги задржаа добивките од њујоршката сесија, кога падот на нафтата го турна приносот на 10-годишните обврзници надолу за девет базични поени, на 4,93 отсто.
Приносот се задржа околу тоа ниво во азиското тргување во петокот, откако достигна дури 5,02 отсто по потегот на Фед. Државните обврзници со слична рочност во Австралија и Нов Зеланд пораснаа, следејќи ги американските државни обврзници.
Златото ги продолжи добивките до околу 4.370 долари за унца, откако во четвртокот порасна за речиси 2 отсто и избриша голем дел од загубата од претходните три сесии.
Јуанот се искачи на највисокото ниво во однос на доларот во повеќе од четири години, продолжувајќи го растот поткрепен со широката сила на кинескиот извоз и поддршката од централната банка.
Пазарите исто така се соочуваат со дополнителен тест во форма на таканареченото „тројно истекување“ - при кое истекува рочноста на дериватните договори поврзани со акции, индексни опции и фјучерси.
Опции со номинална вредност од повеќе од 2 билиони долари истекуваат денес, а историските податоци покажуваат дека S&P 500 има повисока од просечната веројатност да затвори пониско во деновите на тројното истекување, напиша Дилин Ву, стратег во „Пеперстоун“ (Pepperstone Group Ltd).
„Сепак, самото истекување можеби било дел од она што го поттикна купувањето во четвртокот - биковите изгледа се обидоа да ги пробијат клучните технички нивоа пред денешниот настан за да обезбедат поволна поставеност на позициите“, напиша таа. „Дали растот може да продолжи и по истекувањето е најважното нешто што треба да се следи денес.“
.webp){kind=icon}
