Растот на цената на нафтата поттикна нова распродажба на акции и обврзници

Растот на цените на нафтата предизвика нов бран на продажба на обврзници и акции, бидејќи дури и рекордната добивка на технолошкиот гигант за производство на чипови „Самсунг“ (Samsung Electronics Co.) не успеа да побуди побарувачка за поризични средства.

Суровата нафта брент поскапе за приближно 5 отсто, надминувајќи 105 долари за барел, откако еден извештај ги доведе во прашање претпоставките дека претседателот Доналд Трамп ќе се воздржи од ескалација на конфликтот со Иран пред изборите следниот месец. Приносот на 10-годишните американски државни обврзници се зголеми за шест базични поени, на 5,34 отсто. Истото движење беше забележано и низ Европа, каде што притисок се почувствува и врз традиционално побезбедниот германски долг.

S&P 500 се подготвуваше втор ден по ред да се повлече од рекордното ниво. Фјучерсите паднаа за 0,4 отсто, додека договорите на Nasdaq 100 се намалија за 0,6 отсто. „Самсунг“ објави речиси деветкратно зголемување на добивката, но не успеа да ги исполни високите очекувања на пазарот. Акцијата падна за 2,4 отсто во Сеул, додека производителите на чипови забележаа пад во раното тргување во САД. Растот на продажбата од 51 отсто кај ТСМЦ (Taiwan Semiconductor Manufacturing Co.) не придонесе многу за да се поттикне ентузијазмот.

„Секојпат кога нафтата повторно расте, тоа се претвора во повисоки приноси на обврзниците и притисок врз акциите, дури и ако тие во моментов се доста отпорни“, рече Александре Барадец, главен пазарен аналитичар во ИГ (IG) во Париз. „Технологијата и енергијата се главни двигатели на американскиот пазар, па секој навестен знак на забавување неизбежно ќе има влијание.“

Пазарите влегуваат во сезона на објавување на деловните резултати, откако акциите во голема мера го игнорираа скокот на приносите на обврзниците до највисоки нивоа во повеќе децении. Сега корпоративните добивки ќе треба да ја оправдаат таа отпорност, додека водечките компании во изградбата на инфраструктурата за вештачка интелигенција (ВИ) издаваат милијарди долари долг за да ги финансираат своите амбиции.

Дополнителен слој на неизвесност е конфликтот на Блискиот Исток, кој не покажува знаци на завршување и ги одржува цените на нафтата на високо ниво. Високите трошоци за енергија ги зајакнуваат очекувањата дека централните банки ќе продолжат да ги зголемуваат каматните стапки за да ја ограничат инфлацијата, при што зголемувањето од четвртина процентен поен од страна на Федералните резерви (Фед) во декември е целосно вградено во пазарните очекувања.

Гувернерот на Федералните резерви, Кристофер Волер, рече дека веројатно ќе бидат потребни дополнителни зголемувања на каматните стапки за да се забави инфлацијата, иако претставниците имаат одредена флексибилност во однос на времето.

„Ако економските податоци продолжат да пристигнуваат како што се очекува, очекувам дополнителни зголемувања за да поддржиме навремено враќање на инфлацијата кон нашата цел од 2 отсто“, рече Волер во четвртокот во Истанбул. „Зголемувањата не мора да се случуваат на последователни состаноци, но треба да бидат спроведени во прифатлив временски период.“

Во Европа продолжи притисокот врз банките, бидејќи превирањата на француските пазари на долг се заканија да го нарушат секторот што повеќе од една година е најуспешен во регионот. Индексот Stoxx 600 Banks падна дури за 2,2 отсто, со што се движеше кон најголемиот дводневен пад од март.

Франција е заробена во политички застој, кој ги усложнува напорите за намалување на буџетските дефицити што се далеку над целта. Распродажбата на државниот долг доведе до тоа повеќе од една третина од корпоративните обврзници во земјата да се тргуваат како да се побезбедни од државниот долг, според податоците собрани од „Блумберг“.

Пазарот ќе продолжи да ги зголемува премиите на француските приноси сè додека тоа не предизвика официјална реакција доволно силна за да го промени текот, рече Шон Кин, главен стратег за Азија и Пацификот во „ЈБ Дракс Онор“ (JB Drax Honore).

„Франција сега е на сечиј екран, а Европа нашироко се смета за регион со низа нерешливи проблеми за кои нема институционална волја или колективен капацитет да ги реши“, рече Кин.