Златото може да се соочи со мал краткорочен пад на цената ако претставниците на американските Федерални резерви (Фед) неделава одлучат да ја намалат каматата за 25 базични поени. Но благородниот метал понатаму ќе продолжи да се движи во нагорна линија кон рекордна вредност како резултат на растечките текови во фондовите со кои се тргува на берзите, а се поддржани од злато, сметаат експертите од „Голдман Сакс“ (Sachs Group Inc).
„Намалувањето на стапката на Фед би требало да го врати западниот капитал во златните прачки, компонента што во голема мера отсуствува во последните две години“, велат аналитичарите Лина Томас и Даан Струјвен, повторувајќи ја прогнозата на банката дека до почетокот на следната година вредноста на златото ќе достигне ниво од 2.700 долари за унца.
Bloomberg Mercury
Цената на златото конкретно денеска бележи мала промена и унца се тргува за 2.585 долари. Среброто, пак, чини 31 долар за унца, а расте седми ден по ред, со што е на пат да ја оствари најдолгата низа на ценовен раст од 2019 година.
Bloomberg Mercury
Благородниот метал е еден од главните производи со најсилни перформанси годинава, зголемувајќи ја својата вредност за околу една четвртина и постигнувајќи последователни ценовни рекорди додека централните банки ги зголемуваат купувањата, а интересот на трговците е насочен кон монетарното олеснување од страна на Фед. Инвеститорите остануваат поделени околу тоа дали американската централна банка ќе го започне својот циклус на олеснување неделава со намалување за половина поен или, како што очекуваат од „Голдман Сакс“, со поскромно намалување од 25 базични поени.
Извештајот на „Блумберг“ покажува дека глобалните вложувања во златните прачки во последните месеци се зголемија откако претходно, во средината на мај, паднаа на најниско ниво од 2019 година. Но, сепак, треба да се има предвид дека и покрај континуираниот раст на златото, неговата цена денеска и натаму е за околу 25 проценти пониска од рекордот поставен за време на пандемијата во 2020 година.
.webp){kind=icon}
