text size
Државниот завод за статистика пресмета раст од 29,7 проценти на откупот и продажбата на земјоделските производи во вториот квартал, споредено со истиот период лани. Во второто тримесечје се продадени земјоделски производи во вкупна вредност од 54,8 милиони евра, што е за 12,6 милиони евра повеќе од истиот период лани.
Зголемување е забележано кај сите производи, освен кај индустриските и фуражните растенија, овошјето, млечните производи, рибата и другите земјоделски производи.
Кај полјоделството откупот на производите се зголемил за 43,6 проценти за период од една година, кај сточарството растот е 22,2 отсто, додека откупот на овошјето е речиси преполовен, односно е намален за 42,6 отсто. Особено значаен е падот на откупот на овошјето во месец мај за дури 67,2 проценти.
Но, податоците се значајно разиграни и има големи разлики во реализацијата на откупот кај одредени производи. Таков е случајот со млечните производи, чиј откуп споредено за вториот квартал годинава и лани пораснал за дури 371,7 отсто. Но, просекот се должи единствено на големиот раст реализиран во месецот април, кога откупот на млечни производи е зголемен за десет пати во споредба со минатогодишниот април, додека во месец мај и јуни откупот на млечните производи бележи огромен пад од 74,9 проценти, односно 58,9 отсто.
Кај откупот на земјоделски производи од индивидуалните производители е забележано зголемување за 19,5 проценти, додека кај продажбата на земјоделски производи од сопствено производство има зголемување од 39,2 отсто.
.webp){kind=icon}
