Златото на пиедестал за инвестиции, цената ќе се зголемува

Растот на цената на златото забрза во 2025 година и до втората половина на февруари вкупниот раст годинава е околу 12 проценти. Ова е дополнително зголемување и продолжување на трендот од 2024 година, кога цената на златото порасна за цели 27 проценти на годишно ниво. Клучна причина за растот е одржливата висока побарувачка поради геополитичките несигурности, тоа што злато засилено купуваат и централните банки, но и очекувањата за зголемени инфлациски притисоци поради воведувањето царини, што го фаворизира златото како средство за заштита од инфлација.

Од почетокот на годината слабее доларот, што оди во прилог на побарувачката на злато, бидејќи во ваков случај, златото изгледа подостапно кога ќе се изрази во други валути. Дополнително, кога доларот слабее, инвеститорите се свртуваат кон овој метал затоа што тој функционира и како резервна „валута“.

Сепак, односот со доларот е присутен, но тој е делумно во сенка и се манифестира на краток рок. Особено што брзиот пораст на цените секако го направи златото значително помалку достапно. Кина е добар пример од гледна точка на малопродажната побарувачка на злато - побарувачката за накит слабее поради високите цени, додека побарувачката за шипки и монети покажува еластичност, поради посилната функција на складирање на вредност.

Во исто време, Централната банка на Кина продолжи да акумулира златни резерви. Почетокот на 2025 година ни покажува дека иако златото е релативно скапо, преценето според моделите на „Блумберг“, инвеститорите не се откажуваат од металот, бидејќи демне аверзија кон ризик, што ги насочува инвеститорите кон златото како безбедно засолниште.

Станува се поизвесно дека инфлацијата не е работа од минатото, туку дека ќе ја разбудат царините што се воведуваат. Цената на златото прилагодена за инфлацијата беше на исто високо ниво по светската финансиска криза, како и на почетокот на пандемијата.

Во 2025 година, очекуваме цената на златото во просек да биде околу 3.000 американски долари за унца. Во моментов има силен моментум, очекуваме растот на цената на златото да забави подоцна во текот на годината, но не гледаме простор за значителна надолна корекција.