Цената на златото на тринеделен минимум

Златото се тргуваше на најниско ниво во последните три недели откако надлежните од Федералните резерви (ФЕД) ја потврдија одлуката за зголемување на каматните стапки, со цел да се заузда инфлацијата. Претседателот на филијалата на ФЕД во Ричмонд, Томас Барклин, во петокот изјави дека централната банка е решена да ја врати инфлацијата на посакуваното ниво од 2 отсто, па дури и тоа да значи ризик од рецесија во САД.

Целото внимание ќе биде насочено кон годишниот собир на банкарите од централните банки, што ќе се одржи во петок. Се очекува дека ќе се потврди одлуката на ФЕД да продолжи со зголемување на каматната стапка за да може инфлацијата да ја стави под контрола.

Според првичните податоци на Блумберг, побарувачката од инвеститорите е ослабната, а уделите на фондовите со кои се тргува на берзите паѓаат веќе десетта недела по ред.

„Цената на златото би можела да остане под притисок бидејќи гледаме пренасочување на инвестициите од ризичните имоти на сигурниот американски долар“, изјави Равиндра Рао, шеф на секторот за истражување на суровините во Котак Секјуритис. Иако има скромна заинтересираност за купување сепак, според него, ќе бидат потребни многу посилни докази дека инвеститорите повторно вложуваат на пазарот.

Вредноста на златото падна за 0,2 отсто, на 1.742,96 долари за унца, што претставува најниско ниво од 28 јули. Среброто е стабилно, вредноста на платината падна, а цената на паладиумот се зголеми за 0,6 проценти.