text size
Цената на нафтата се стабилизира по тридневниот раст, бидејќи вниманието сега е пренасочено – од смирувањето на трговската војна меѓу САД и Кина кон Блискиот Исток.
Со нафтата брент се тргуваше по цена повисока од 64 долари за барел, откако претходниот ден забележа раст од 1,6 отсто, додека ВТИ (West Texas Intermediate) беше близу 62 долара. Фјучерсите во понеделникот изгубија дел од дневната добивка откако американскиот претседател Доналд Трамп за време на викендот најави напредок во нуклеарните преговори меѓу САД и Иран. Тоа ги зајакна очекувањата дека наскоро би можеле да се ублажат рестрикциите за извоз на иранска нафта.
Трамп во вторникот ја започнува својата посета на Блискиот Исток, а прва станица му е Саудиска Арабија – неформалниот лидер на групата ОПЕК+. Кралството се залагаше за зголемување на производството со цел да ги казни членовите што не се придржуваат до договорот, што годинава придонесе за пад на цените. Нафтата изгуби повеќе од 10 отсто од вредноста откако Трамп на почетокот на април најави сеопфатни царини, што предизвика контрамерки од трговските партнери, вклучувајќи ја и Кина, и ги загрози економскиот раст и побарувачката за гориво.
Bloomberg
Иако „царинското примирје“ од 90 дена, склучено меѓу двата најголеми потрошувачи на нафта, донесе извесно олеснување, се очекува дека Организацијата на земји извознички на нафта (ОПЕК) и нејзините сојузници дополнително ќе го зголемат производството на состанокот на 1 јуни, што ја засилува загриженоста дека подоцна во текот на годината може да дојде до презаситеност на пазарот.
„Посетата на Трамп на Блискиот Исток неделава ќе биде во фокусот поради можните разговори за политиката за производство на нафта и потенцијалните мировни договори за Газа и Украина“, изјави Вандана Хари, основачка на ВИ (Vanda Insights) од Сингапур.
„Трговските војни што ги водат САД ќе останат во центарот на вниманието, а договорите со другите големи трговски партнери би можеле да го подобрат расположението, иако тоа ќе има мал ефект кога станува збор за нафтата“.
Трговците исто така ќе внимаваат на извештаите за состојбата во индустријата во текот на неделава, за да добијат дополнителен увид во пазарната динамика. ОПЕК ќе објави месечен извештај в среда, додека Меѓународната агенција за енергија (ИЕА) ќе го објави својот извештај еден ден подоцна.
.webp){kind=icon}
