Златото повторно е барано прибежиште откако „Мудис“ го намали кредитниот рејтинг на САД

Цената на златото утрово малку порасна - иако ги намали добивките од почетокот на сесијата на тргувањето - бидејќи растечката загриженост за економските перспективи на САД и буџетскиот дефицит ја зголемија побарувачката за средствата што важат за засолништа.

Златото се тргуваше над 3.218 долари за унца откако порасна за дури 1,4 проценти во азиското утринско тргување. Тоа се случи откако рејтинг-агенцијата „Мудис“ (Moody's Ratings) доцна во петокот објави дека го намалува највисокиот кредитен рејтинг на американската влада од Aaa на Aa1, обвинувајќи ги и двете администрации во изминатиот период за неможност да го намалат буџетскиот дефицит.

„Иако препознаваме значајни економски и финансиски предности на САД, веруваме дека тие повеќе не го компензираат целосно падот на фискалните показатели“, се наведува во соопштението на „Мудис“.

Благородниот метал во последните месеци доживеа ценовни осцилации. Тој претрпе најголема неделна загуба од ноември минатата недела поради ублажување на геополитичките тензии, по жестокиот раст во кој минатиот месец за првпат се искачи над 3.500 долари. Златото годинава сè уште има цена повисока за над една петтина, поттикнато главно од глобалните конфликти, царинската треска на американскиот претседател Доналд Трамп и приливот во фондовите што се тргуваат на берза.

„Очекуваме златото да биде нестабилно на краток рок, бидејќи гледаме мешавина од добри и лоши наслови на вести“, рече Васу Менон, директор за инвестициска стратегија во „Оверси чајнис бенкинг“ (Oversea-Chinese Banking Corp). На долг рок, политиките на Трамп и диверзификацијата на средствата деноминирани во долари се „структурни двигатели за златото што би можеле да го доведат до нови височини во наредните години“, рече тој.

Златото порасна за 0,5 проценти, на 3.218,30 долари во рамките на азиското тргување. Индексот Bloomberg Dollar Spot се намали за 0,2 отсто. Среброто, паладиумот и платината се зголемија.