Цената на златото е на месечен минимум

Цената на златото паѓа веќе втор ден по ред откако претседателот на Федералните резерви (ФЕД), Џерем Пауел, го одржа говорот од кој што може да се заклучи дека централните банкари не планираат во скоро време да ја релаксираат монетарната политика, туку против инфлацијата планираат да се борат преку високи каматни стапки.

Благородниот метал се продава за најмалку пари во последните 30 дена, а цената се движи и кон петти месечен пад, што е прв толкав пад во последните четири години. Подигнувањето на каматните стапки на ФЕД традиционално се одразува на начин што го прави златото помалку исплатливо за инвеститорите. Зајакнувањето на доларот исто така негативно влијае на цената на златото пресметано во американската валута. Приносот на двегодишните обврзници го достигна највисокото ниво од 2007 година.

„Иако на цената на златото негативно влијае силниот американски долар, нестабилноста на американските берзи може поволно да се одрази на златото, кое што за луѓето претставува сигурна инвестиција“, вели Џон Финеј од компанијата Гардијан Голд Австралија (Guardian Gold Australia).

Сенаторката Елизабет Ворен го критикуваше планот на ФЕД за намалување на стапката на инфлација, тврдејќи дека таквата монетарна политика ќе ја турне земјата во рецесија, а дека подигнувањето на каматните стапки не може да доведе до стабилизација на цените.

Цената на златото утрово на европските пазари падна за 0,78 отсто на 1.724,17 долари за унца.

Во моментов нема коментари за веста. Биди прв да коментира...

Остави коментар