„Некспирија“ ќе продолжи со испорака на чипови

САД се подготвени да објават дека „Некспирија“, холандска компанија за полуспроводници со капацитети во Кина, ќе продолжи со испорака на чипови, според лице запознаено со ситуацијата, по трговскиот договор постигнат меѓу Доналд Трамп и Шји Џјинпинг на нивниот самит оваа недела.

Администрацијата на Трамп се очекува да ги објави деталите за овој потег во информативен документ што се подготвува за трговскиот договор меѓу САД и Кина, рече лицето, зборувајќи под услов на анонимност бидејќи станува збор за информација што сè уште не е јавно објавена. Веста првично ја објави „Волстрит џурнал“.

Овој потег веројатно ќе ги ублажи стравувањата околу испораките на чипови, кои се закануваа да ја нарушат автомобилската продукција во Европа и на други места, во услови на поширока трговска војна меѓу Кина и САД и нивните сојузници, која ги потресе пазарите.

Овој месец, Пекинг ја блокираше „Некспирија“ — клучен снабдувач на чипови за автомобилската и потрошувачката електроника — од извоз од нејзините капацитети во Кина. Потегот беше одговор на холандската влада која презеде контрола врз кинескиот сопственик на компанијата, што ги нагласи влошените трговски односи меѓу Кина и Западот.

Министерството за трговија на Кина реагираше во саботата, соопштувајќи дека ќе дозволи извоз под одредени услови, без да ги наведе производите кои ќе бидат изземени од ограничувањата, ниту пак да даде детали за критериумите за подобност.

Автомобилските производители ширум светот се подготвуваат за намалување или целосно запирање на производството како последица на замрзнувањето на извозот. Европската автомобилска индустрија работи непрекинато за да спречи конфликтот да предизвика прекини во производството, а добавувачите го намалуваат производството на компоненти за големи производители како „Фолксваген“ и БМВ.

Минатата недела, најголемата асоцијација на добавувачи на возила во САД предупреди дека американската автомобилска индустрија е на две до четири недели од прекин на производството, а извршниот директор на „Форд“ го нарече тоа „прашање на целата индустрија“ кое бара политичко решение.

Рамката за продолжување на испораките на чипови ќе биде детално објаснета во информативниот документ од администрацијата, кој ги истакнува условите од трговскиот договор постигнат меѓу Трамп и Шји на нивниот самит во Јужна Кореја.

Тој договор, кој следеше по нивната прва средба лице в лице од 2019 година, предвидува Кина да го одложи воведувањето на строги контроли ретки елементи и да продолжи со купување на американски соја и други земјоделски производи. За возврат, САД се обврзаа да го преполоват царинскиот данок поврзан со фентанил за Кина и да се воздржат од воведување на100 отсто данок на кинеска стока што Трамп се закани дека ќе го воведе од ноември. САД исто така паузираат некои реципрочни царини за Пекинг за дополнителна година.

Конфликтот околу „Некспирија“ се заостри во петокот, кога компанијата ги запре испораките до својата фабрика во Кина поради несогласувања со управата на локацијата, што дополнително го влоши конфликтот кој веќе влијае врз автомобилското производство во Европа и пошироко.

Холандскиот производител обезбедува големи количини чипови кои се користат во автомобилската и потрошувачката електроника. Тој управува со фабрики за производство на полуспроводнички плочи во Германија и Велика Британија. Освен капацитетот за склопување и тестирање во Кина, има и објекти на Филипините и во Малезија.

Полуспроводниците имаат големо значење во трговската војна меѓу САД и Кина, при што Трамп се обидува да го ограничи пристапот на Кина до напредни чипови во трката за технолошка доминација во областа на вештачката интелигенција и други полиња. Пекинг, пак, ја користи својата доминација во производството на ретки елементи како преговарачки адут, заканувајќи се дека ќе го ограничи пристапот до минерали неопходни за високотехнолошко производство на широко користени потрошувачки производи.