Биткоинот го почна месецов со пад под 86.000 долари

Криптовалутите денеска нагло паднаа, внесувајќи нов импулс во широката распродажба, која се чинеше дека се смирила.

На почетокот на денешното тргување во Азија биткоинот падна дури за шест проценти, под границата од 86.000 долари, додека вредноста на етерот се намали за повеќе од седум отсто, на околу 2.800 долари, според податоците собрани од „Блумберг“. Поголемиот дел токени се движеа во истата насока, при што соланата падна за 7,8 отсто.

Пазарот на криптовалутите е на нестабилно тло по повеќенеделната распродажба, која започна кога околу 19 милијарди долари во левериџ облози беа избришани на почетокот на октомври, само неколку дена откако биткоинот постави рекорд од 126.251 долар. Оригиналната криптовалута во ноември изгуби 16,7 проценти од својата вредност, но намалувањето на притисокот за продажба доведе до тоа да се врати назад во правилна насока во текот на минатата недела, зголемувајќи ја својата вредност и надминувајќи 90.000 долари.

По последниот бран на продажба што се случува денеска, трговците се подготвуваат за поголеми падови.

„Тоа е ризик од почетокот на декември“, рече Шон Мекналти, раководител за тргување со деривати за азиско-пацифичкиот регион во „Фалкон Х“ (FalconX). „Најголемата загриженост се оскудните приливи во биткоин-фондовите со кои се тргува на берза и отсуството на купувачи во пад. Очекуваме неповолните структурни услови да продолжат и овој месец. Гледаме дека 80.000 долари за биткоинот ќе бидат следното клучно ниво на поддршка.“

Bloomberg

 

Инвеститорите денеска ги анализираат и коментарите од главниот извршен директор на „Стратеџи“ (Strategy Inc.), Фонг Ле, кој во поткаст во петокот рече дека купувачот на биткоин би можел да го продаде токенот ако неговата mNAV - сооднос на вредноста на претпријатието кон поседувањата биткоин - стане негативна. „Можеме да продаваме биткоини и би ги продавале ако треба да ги финансираме нашите исплати на дивиденда под 1x mNAV“, рече тој, додавајќи дека тоа би било последно решение. „Стратеџи“, компанијата што има резерви од биткоин од 56 милијарди долари, забележа пад на својот mNAV на 1,19, според информациите од нејзината интернет-страница.

Во меѓувреме, „Ес енд Пи глобал рејтингс“ (S&P Global Ratings) минатата недела ја намали процената за стабилноста на USDT, најголемата стабилна валута во светот, на најнизок рејтинг, предупредувајќи дека падот на вредноста на биткоинот би можел да го остави токенот недоволно обезбеден. Дополнителна неизвесност дојде од Народната банка на Кина, која во саботата издаде предупредување за ризиците од виртуелните валути, вклучувајќи ги и стабилните монети, додавајќи дека владините агенции треба да ја продлабочат координацијата за да се справат со нелегалните активности.

Џеф Ко, главен аналитичар во „Коинекс“ (CoinEx), рече дека низата негативни случувања во текот на викендот, вклучувајќи ги и намалувањето на рејтингот на USDT и предупредувањето од Народната банка на Кина, го обновија притисокот на криптовалутите.

Претстојнава недела ќе понуди клучен преглед за економскиот замав на САД, додека креаторите на политиките ја проценуваат траекторијата на каматните стапки во пресрет на 2026 година. Податоците веројатно ќе ги обликуваат очекувањата за тоа дали американските Федерални резерви (Фед) ќе го продолжат својот циклус на намалување на стапките. Американскиот претседател Доналд Трамп вчера изјави дека одлучил кој ќе биде следниот претседател на Фед, откако јасно стави до знаење дека очекува неговиот кандидат да ги намали каматните стапки.

Индексот на азиските акции флуктуираше во раното тргување откако го достигна својот најдобар неделен раст за последните два месеца, додека фјучерсите на индексот S&P 500 паднаа. Во негатива се и јапонските акции, а јенот се зголеми откако гувернерот на Банката на Јапонија, Казуо Уеда, испрати најјасна индикација досега за зголемување на каматните стапки овој месец.