Криптопазарот избриша 1 билион долари, биткоинот повторно тоне

Големиот пад на криптото од 2025 година влезе во нова фаза во средата, откако биткоинот падна на најниското ниво во последниве седум месеци, со што избриша повеќе од 1 билион долари низ светот на дигиталните средства.

Најголемата криптовалута се спушти до 88.522 долари, при што најновиот пад ги погоди и големите и малите инвеститори — од малопродажни купувачи „на дип“ до трезорски фирми за дигитални средства, чија акциска премија исчезнува.

Цените на токените делумно закрепнаа откако „Енвидија“ објави силна прогноза за приходите, што помогна да се ублажат стравувањата дека глобалниот бран на трошоци за ВИ може да почне да се гаси. Биткоинот порасна до 2,5 отсто во четвртокот наутро за време на тргувањето во Азија.

Следните психолошки нивоа се околу 85.000 и 80.000 долари. Во фокус повторно се враќа и претходното годишно дно од 74.425 долари, поставено во април за време на тарифните турбуленции. Вкупната пазарна капитализација на криптовалутите достигна околу 4,3 билиони долари на 6 октомври, а сега се движи блиску до 3,2 билиони. Сепак, поголемиот дел од таа промена претставува „хартиени“ загуби, а не реални пари што ја напуштиле пазарната сцена.

Bloomberg

По лавината присилни ликвидации на 10 октомври, кога беа затворени повеќе од 19 милијарди долари позиции купени со позајмени средства, се откри колку е пазарот кревок. 

Настанот предизвика домино-ефект од повици за дополнително обезбедување, одливи од берзански фондови и практично замрен интерес за нови купувања.

„Инвеститорите малку тапкаат во темнина, немаат јасна насока за макроекономијата, па го следат само тоа што го прават големите ‘китови’ на блокчејн-мрежата и тоа ги загрижува“, рече Џејмс Батерфил, раководител на истражувања во „Коиншерс“ (CoinShares).

Силниот скок на биткоинот над 126.000 долари претходно годинава се темелеше на две очекувања: повеќекратни намалувања на каматите од Федералните резерви и растечко институционално усвојување. И двете приказни запреа, а инвеститорите што купуваа во периоди на забрзан раст се повлекоа. Падот силно ги погодува трезорските фирми за дигитални средства, чии вреднувања беа изградени врз претходниот силен раст на пазарот.

Во меѓувреме, етeрот повторно падна под 3.000 долари. По слабата прва половина од пазарниот подем годинава, вториот најголем токен во август се искачи до речиси 5.000 долари, накратко надминувајќи го својот врв од 2021 година, но оттогаш ги загуби тие добивки.

„Мислам дека сме поблиску до крајот на распродажбата отколку до нејзиниот почеток, но пазарите се нервозни и криптото може да оди уште пониско пред да најде основа за закрепнување“, рече Метју Хауган, главен инвестициски директор на БАМ (Bitwise Asset Management)

Биткоинот во четвртокот се тргуваше по 92.395 долари во 11:39 часот во Сингапур.