Руската нафта е најевтина од почетокот на војната поради притисокот од Западот

Цените на руската сурова нафта се на најниско ниво од почетокот на војната во Украина бидејќи санкциите ги продлабочуваат попустите што треба да ги понуди нафтената индустрија на земјата, а референтните фјучерси паѓаат.

Во просек, руските извозници на нафта добиваат нешто над 40 долари за барел за товари испратени од Балтичко Море, Црно Море и источното пристаниште Козмино, според податоците од „Аргус медија“ (Argus Media). Тоа е намалување од 28 проценти во последните три месеци, а неодамнешните ограничувања насочени кон нафтените гиганти „Роснефт“ (Rosnjeft PJSC) и „Лукоил“ (Lukoil PJSC) ги зголемуваат намалувањата.

Bloomberg Mercury

 

Растечкиот притисок од Западот врз трговијата со нафта на Русија ги отежнува продажбата и испораката на барелите, а мерките се насочени и кон рафинериите од главните купувачи на руска нафта, како Индија. Покрај тоа, глобалните референтни цени на нафтата се намалуваат и денеска се тргуваат по цена помала од 60 долари за барел. Последен пат толку ниско ценовно ниво се постигна во мај.

Приходите што Русија ги добива за својата нафта, која заедно со гасот сочинува околу една четвртина од државниот буџет на земјата, се клучни за финансирање на нејзината војна. Пониските приходи ги оптоваруваат финансиите на нафтените компании во земјата и го намалуваат износот на данок што го плаќаат во касата на Кремљ.

 

Администрацијата на американскиот претседател Доналд Трамп во последните неколку недели поведе дипломатска кампања насочена кон прекин на конфликтот. При неодамнешната посета на Индија рускиот претседател Владимир Путин призна дека економскиот раст на неговата земја забавува.

Индиските власти изјавија дека очекуваат увозот од Русија овој месец да изнесува околу 800.000 барели дневно, што е значително помалку отколку во ноември, иако и натаму станува збор за значителен обем на резерви. Една кинеска рафинерија неодамна купи пратка сурова нафта од источните пристаништа на Русија со најголем попуст оваа година. Тие две азиски земји се главни купувачи на руската нафта.