Американски функционери биле цел на напаѓачот на гала вечерата во Вашингтон

Вооружениот осомничен кој се обидел да влезе во салата во Вашингтон каде што говорел претседателот Доналд Трамп најверојатно целел функционери од администрацијата, изјави вршителот на должност јавен обвинител Тод Бланш.

Бланш во неделата за Ен-би-си изјави дека мажот најверојатно дејствувал сам, откако со воз допатувал од Калифорнија и престојувал во хотелот „Вашингтон Хилтон“, каде што се одржуваше традиционалната вечера на дописниците од Белата куќа, на која Трамп требаше да говори.

Врз основа на досегашната истрага, „веруваме дека осомничениот целел функционери од администрацијата“, рече Бланш, повикувајќи се на одредени пишувања на осомничениот и разговори со луѓе што го познавале. Тој одби директно да каже дали Трамп бил целта, наведувајќи само дека и тој е дел од администрацијата.

И натаму не е јасно кои биле мотивите на осомничениот, рече Бланш, додавајќи дека засега не гледа поврзаност со конкретна политика на администрацијата.

Осомничениот напаѓач — идентификуван како 31-годишниот Кол Томас Ален од Торенс, Калифорнија — во понеделник ќе биде обвинет за напад врз федерален службеник и употреба на огнено оружје при напад, рече Бланш. Подоцна за Си-би-ес додаде дека се можни и дополнителни обвиненија, зависно од мотивот и доказите собрани во тековната истрага.

Агент на Тајната служба бил погоден, но куршумот завршил во неговиот панцирен елек и службеникот „ќе биде добро“, изјави во саботата навечер обвинителката за округот Колумбија, Жанин Пиро.

Пукањето го прекина првото појавување на Трамп како претседател на традиционалната вечера, на која неговите претходници редовно присуствуваа. Припадници на Тајната служба влетаа во салата и ги евакуираа Трамп, првата дама Меланија Трамп, потпретседателот Џеј Ди Венс и членови на кабинетот. Присутните се засолниле под масите. Инцидентот се случил непосредно пред салата на хотелот „Вашингтон Хилтон“.

Пукањето е најнов пример на политичко насилство во САД, по нападот на Капитол на 6 јануари 2021 година и палењето на резиденцијата на гувернерот на Пенсилванија. Трамп и претходно беше мета на обиди за атентат, меѓу кои и на митингот во Пенсилванија во 2024 година, кога увото му беше повредено од куршум.

Мотивот на напаѓачот останува нејасен, но се верува дека станува збор за „осамен вол“, изјави Трамп на саботната прес-конференција.