Нафтата до 107 долари за барел по офанзивата на Хутите

Цената на нафтата брент се искачи до 107 долари за барел, поттикната од засилените борби на Блискиот Исток и растечките стравувања дека конфликтот би можел дополнително да го наруши глобалното снабдување со енергенти.

Глобалниот нафтен репер во претходната трговска сесија порасна за повеќе од шест отсто и е на пат да забележи најголем неделен раст од јули. Американската нафта ВТИ (WTI) се тргуваше околу 102 долара за барел.

На пазарите дополнителна загриженост предизвикува напредувањето на силите на јеменските Хути, кои се поддржани од Иран, кон крајбрежните области во близината на стратешкиот теснец Баб ел Мандеб. Хутите се обидуваат да го преземат Мока, пристаниште во јужниот дел на Црвено Море, што би им овозможило да го зголемат притисокот врз еден од клучните поморски коридори за глобалната трговија.

Цената на нафтата расте по ескалацијата на непријателствата на Блискиот Исток

Обновените судири поттикнуваат страв од посериозни прекини во снабдувањето Bloomberg

Аналитичарите предупредуваат дека повторното избувнување на целосна војна меѓу Саудиска Арабија и Хутите би можело да стане дополнителен катализатор за силен раст на цените на нафтата. Секое проширување на борбите кон Баб ел Мандеб би го зголемило ризикот за танкерскиот сообраќај и за испораките на сурова нафта и нафтени деривати.

Ризиците за енергетскиот пазар се зголемуваат и поради продолжените тензии околу Ормускиот Теснец, низ кој минува значаен дел од светската трговија со нафта. Дел од извозот продолжува да се одвива и понатаму, но танкерите се соочуваат со постојана опасност од напади. Британската служба за поморски трговски операции соопшти дека на 10 септември два брода биле погодени од неидентификувани проектили западно од Касаб во Оман.

Во меѓувреме дипломатските напори за обезбедување на поморскиот сообраќај низ Ормускиот Теснец продолжуваат. Дипломати од шесте земји членки на Советот за соработка на Заливот в понеделник треба да се сретнат со ирански претставник, во рамките на иницијатива на Оман и Иран за привремено регулирање на пловидбата низ теснецот.

Енергетскиот пазар дополнително го притиска и намалувањето на производството во Саудиска Арабија. Земјата соопшти дека производството на нафта минатиот месец повторно се намалило и паднало на најниско ниво од 1990 година.

Цените се поддржани и од зголемените набавки на сурова нафта од Кина, што дополнително ги намалува расположливите резерви на глобалниот пазар. Во услови на веќе намалени резерви, секое ново нарушување на испораките од Блискиот Исток би можело да предизвика дополнителен ценовен шок.

Брентот годинава веќе е поскап за речиси 80 отсто, иако сè уште е под воениот максимум од нешто над 126 долари за барел, достигнат во април. Истовремено растат и европските цени на природниот гас и трошоците за транспорт со танкери, додека дизелот бележи уште поголеми поскапувања, под дополнителен притисок од војната меѓу Русија и Украина.

Економистите оценуваат дека пазарот почнува да очекува подолг и посериозен конфликт со Иран. Според нив, комбинацијата од ограничени глобални резерви и првите знаци на закрепнување на кинеската побарувачка значи дека ново нарушување на енергетските текови од Блискиот Исток може повторно да ги турне цените кон неодамнешните рекордни нивоа.