„Најк“ е победник во битката за дресови на Мундијалот во Катар

Кога ќе почне ФИФА Светското првенство во Катар, во текот на овој викенд, дури 13 од 32 земји на стадионите ќе играат во дресови од „Најк“ (Nike), што е најмногу од сите спонзори за спортска опрема на годинешниот турнир. Оваа година „Адидас“ (Adidas), чие седиште е во Германија, ќе опреми само седум нации.

Ова е само третпат компанијата „Најк“, со седиште во Орегон, да го надмине „Адидас“, и тоа со најголема разлика што „Најк“ ја имал кога било на мундијалите досега во однос на својот долгогодишен ривал. Договор со „Најк“, покрај репрезентацијата на домаќинот Катар, имаат неколку од помоќните држави, како САД, Бразил, Англија и Франција. Популарноста на „Најк“ оди паралелно со спласнувањето на моќта на „Адидас“, спортскиот гигант што во својот најдобар период опреми речиси две третини од фудбалерите на Светското првенство во Италија во 1990 година.

Bloomberg Mercury

 

Договорите за лиценцирање се клучни за компаниите за спортска опрема во нивниот обид да загризат што повеќе од 30 милијарди долари вредниот светски лиценциран пазар за спортски производи. Со децении „Адидас“ беше примарно име за опремата на светските првенства. Компанијата спонзорираше девет од 16 фудбалски репрезентации на Светското првенство во Германија во 1974 година и ја продолжи својата доминација до неодамна. „Најк“, компанијата што неодамна почна да спонзорира фудбалска опрема, првпат влезе во борбата за овој пазарен удел на Светското првенство во Франција во 1998 година, кога спонзорира пет репрезентации. Оттогаш постојано само го зголемува пазарниот удел.

Bloomberg Mercury

 

Меѓутоа, портпаролот на „Адидас“ рече дека нивната компанија има корист од престижните тимови што играат во дресовите со три линии.

„Не станува збор само за квантитет туку и за квалитет. Ние опремуваме четири репрезентации што се меѓу фаворитите за титула, како Аргентина, Шпанија, Белгија и Германија“, рече Стефан Пурше, портпарол на „Адидас“.

Шест од седум нации што играат во дресовите на „Адидас“ се рангирани меѓу 20-те најдобри фудбалски репрезентации во светот, покажува статистиката на ФИФА. „Најк“, исто така, спонзорира врвно рангирани тимови, односно седум нации од вкупно 13 што ќе носат нивна опрема се меѓу 20-те најдобри, но оваа марка е поврзана и со пониско рангирани тимови, како Катар и Саудиска Арабија. И двата се рангирани меѓу најлошите тимови на првенството оваа година. „Најк“ сепак има еден адут, а тоа е Бразил, репрезентацијата што освои најмногу титули на светските купови и што е меѓу фаворитите за победа оваа година.

Во моментов нема коментари за веста. Биди прв да коментира...

Остави коментар