„Он холдинг“ (On Holding AG) развива производи за фудбал, бидејќи швајцарскиот бренд сака да се прошири надвор од своите корени во трчањето и да го задржи брзиот раст.
Брендот е „апсолутно“ заинтересиран да влезе во фудбалскиот сектор и верува дека неговата роботизирана технологија за изработка на обувки „Лајтспреј“ (LightSpray) ќе му даде предност, изјави коосновачот Оливие Бернар во интервју во седиштето на компанијата во Цирих.
Компанијата, поддржана од Роџер Федерер, бележи брз раст од основањето во 2010 година, почнувајќи со иновативни и удобни обувки за трчање, а потоа проширувајќи се во тенисот, тренинзите и спортовите на отворено. Таа настојува да ги зголеми и приходите од облека, како од спортската програма така и од производите за секојдневен стил.
Иако фудбалот долго време е најпопуларниот спорт во светот, во последниве години уште повеќе добива значење како извор на модни и лајфстајл производи за конкурентите „Адидас“ (Adidas AG), „Најк“ (Nike Inc.) и „Пума“ (Puma SE). Овие брендови во моментов бележат силен раст на продажбата на фудбалски дресови на репрезентациите што ги спонзорираат на Светското првенство.
Првиот чекор на „Он“ кон фудбалот беше направен во декември, кога компанијата потпиша договор со швајцарската тинејџерска ѕвезда Сидни Шертенлајб, која настапува за „Барселона“, за заеднички развој на производи наменети за тренинг и секојдневна употреба.
„Веќе му покажавме на светот дека сме заинтересирани да влеземе во овој спорт“, изјави Бернар во четвртокот. „Единствената тајна е кој ќе биде следниот“, рече тој, алудирајќи на можните нови имиња што компанијата ќе ги ангажира.
Тјери Анри, поранешната ѕвезда на француската репрезентација и на „Арсенал“ во англиската Премиер лига, во изминатата година повеќепати објавуваше фотографии на социјалните мрежи облечен во облека од „Он“.
„Он“ ја проширува роботизираната технологија „Лајтспреј“ за да ја прошири нејзината примена од врвните маратонски обувки кон производи за поширокиот пазар.
Компанијата планира да отвори уште една фабрика во Виетнам уште оваа година, а работи и на можни локации во САД, а подоцна и во Европа, изјави коизвршниот директор Каспар Копети во посебно интервју. Претходно оваа година компанијата отвори фабрика и во Јужна Кореја.
Технологијата „Лајтспреј“, според Бернар, „има смисла и за производство на фудбалски копачки“.
.webp){kind=icon}
