Македонските граѓани можат без виза да патуваат во 125 земји, додека 101 држава бараат виза за македонските патници, покажа истражувањето на лондонската консултантска компанија за имиграции „Хенли енд партнерс“ (Henley & Partners), според кое македонскиот пасош е на 43.место на листата најмоќни во светот. Нашата земја има подобрување за две места во однос на 2022 година, кога го зазеде 45-то место на оваа листа. На оваа информација веројатно најмногу се радуваат помладите генерации кои со право сакаат да избегаат ако се земе предвид дека, како сме тргнале, ќе ни требаат четири децении за да ја стигнеме ЕУ на економски план.
Добро утро, подолу петте вести што ги издвоивме за почеток на денот:
Данокот од крипто-заработките енигма во Македонија
Крипто средствата што можат да се користат како инструменти за плаќање се размножија во повеќе од 10.000 варијанти од дебито на биткоин во 2009 година, првата и сè уште најголема криптовалута. Збунувачката брзина со која тие се развија и тајноста што можат да ја дадат ги оставија даночните системи со подотворени усти за тоа како да се регулира оваа област.
Блумберг Адрија
Ова е став на аналитичарите на Меѓународниот монетарен фонд (ММФ) кои во последната анализа за криптовалутите посветија големо вимание на даночењето на добивките остварени со тргување на криптовалути. А колку добивки пријавиле Македонците? Колкав данок платиле обврзниците за тие заработки?
Ангеловска-Бежоска: Со ова темпо ќе ни требаат 40 години за европски доход
По глобалната економска криза процесот на доходовна конвергенција во регионот на Западен Балкан забави во голема мера како резултат на структурните пречки поврзани со фундаменталните фактори на растот – човечкиот капитал, физичкиот капитал и продуктивноста, истакна гувернерката на Народната банка, Анита Ангеловска-Бежоска на 9. конференција на ЕЦБ на тема „Менување на геополитичкиот пејзаж ‒ економски последици за Централна, Источна и Југоисточна Европа (ЦИЈИЕ)“
„Симулациите покажуваат дека доколку продолжиме со истата релативна брзина на растот како досега, ќе ни требаат околу 40 години да го достигнеме просечното ниво на доход во ЕУ. Ризикот од геокономска фрагментација, доколку не е соодветно следен, може дополнително да ја забави конвергенцијата. За малите и отворени економии како нашата, коишто треба да ги надминат структурните пречки за раст, потребна е посилна глобална интеграција, а не дезинтеграција“, истакна гувернерката.
Утврдени максимални трошоци за брзите кредити
Финансиско друштво нема да може да склучи договор за потрошувачки кредит ако трошоците што не влегуваат во годишната стапка на вкупни трошоци надминуваат 60 проценти од износот на одобрениот кредит. Ова е една од законските измени што ги подготви Министерството за финансии, а кои беа усвоени во Собранието, информираа денеска од Министерството за финансии.
Поконкретно, надоместоците се однесуваат на сите трошоци што потрошувачот ги плаќа или има обврска да ги плати во текот на целиот период на важност на договорот, а кои произлегуваат или на каков било начин се поврзани со договорот за потрошувачки кредит или поврзани услуги, и тие нема да може да бидат повеќе од главнината на кредитот.
ЛГ претстави двојазичен софтвер за вештачка интелигенција
Јужнокорејскиот производител ЛГ (LG) ја претстави надградената верзија на својот софтвер за вештачка интелигенција (ВИ) и покажа дека може да ја примени во сите сегменти од својот бизнис, од електроника до хемиско производство. Ажурираниот основен модел на ЛГ Ексауан 2.0 (LG Exaone 2.0), чија оригинална верзија беше претставена во 2021 година, може да сфаќа слики и да разбира информации на корејски и англиски јазик.
Новата верзија е обучена на околу 45 милиони тези и патенти, како и 350 милиони слики, објави компанијата. Компанијата им се придружува на технолошките фирми низ светот што лансираат апликации за ВИ, како ЧетГПТ на „Опен еј-ај“. ЛГ тврди дека со новиот двојазичен модел има предност пред домашните конгломерати како „Самсунг“ и „Хјундаи“.
Барбиманија и во Скопје: Распродадени билетите за премиерата
Распродадени се речиси сите влезници за премиерата на големата летна филмско двојка - филмовите „Барби“ и „Опенхајмер“ во „Синеплекс“ во Скопје, потврдуваат оттаму за „Блумберг Адрија“. На утрешната премиера „Барби“ ќе се емитува во десет сали во различни термини, а пригодно за денот е планирано да има и таканаречена програма „Лејдис најт“.
Розовата комедија со Маргот Роби во главната улога се очекува да го надмине црно-белиот биографски филм за создавањето на атомската бомба, барем поради приходите од благајните и маркетиншката стратегија што предизвика да се продаваат стотици поврзани производи. Светската премиера на филмот на „Ворнер брос“ (Warner Bros.) се одржа на 9 јули во Лос Анџелес, а во Македонија за првпат ќе биде прикажан в четврток, на 20 јули.
.webp){kind=icon}
