Цените на гасот во средата скокнаа за 40 отсто, вчера се намалија и се стабилизираа. Претходно, Е.ОН СЕ (E.ON SE), една од најголемите европски енергетски компании, предупреди дека постои ризик и за цените на струјата во текот на постудените месеци. Цената на храната оди нагоре, предупреди Организацијата за храна и земјоделство минатата недела, а сега и оризот поскапе за 15 отсто, што ќе биде силен удар за најсиромашните. Во исто време, САД бележат најнизок раст на базичната инфлација (која ги исклучува цените на енергентите и храната) во последните две години. Се гледа ли крајот на високата инфлација или зимата допрва доаѓа?
Во продолжение се петте клучни вести што треба да ги знаете за почеток на овој ден.
Ќе направи ли Австралија проблем со цената на гасот во Европа?
Цените на гасот во Европа повторно се нестабилни оваа недела, бидејќи трговците го одмеруваат влијанието на сè пополните складишта од една страна и можните штрајкови во Австралија, кои би го нарушиле глобалното снабдување со течен природен гас (ЛНГ), од друга страна.
Моментална закана е можниот штрајк во постројките за ЛНГ во Австралија, што би можело да наруши околу 10 отсто од глобалниот извоз на овој енергент. Доколку се случат штрајкови, азиските купувачи ќе бараат алтернативни извори надвор од регионот, а тоа потоа ќе ја интензивира пазарната конкуренција со европските купувачи.
Базичната инфлација во САД со најмал последователен раст во две години
Основниот индекс на потрошувачките цени (CPI), кој ги исклучува нестабилните ставки како храна и енергија, порасна за 0,2 отсто втор месец, покажуваат податоците на Бирото за статистика на трудот од четвртокот. Ова го означи најмалиот последователен раст во повеќе од две години.
Економистите ја гледаат основната мерка како подобар показател за базичната инфлација во однос на вкупниот CPI, кој исто така се зголеми за 0,2 отсто во јули и за 3,2 отсто од пред една година. Основниот индекс е зголемен за 4,7 отсто во однос на јули 2022 година. Иако е сè уште покачена, основната инфлација забавува речиси секој месец откако достигна врв од 6,6 отсто во септември.
Bloomberg
САД воведуваат ограничувања на инвестициите во кинески технолошки компании
Американскиот претседател Џо Бајден во средата потпиша извршна наредба со која се ограничуваат одредени американски инвестиции во Кина, со цел да се заштитат чувствителните технологии. Пекинг го осуди овој потег како прекршување на принципите на пазарната економија и фер конкуренцијата, пишува германската агенција ДПА (DPA).
Бајден рече дека „прогласува национална вонредна состојба за да одговори на заканата од напредокот на земјите што предизвикуваат загриженост во сферата на чувствителните технологии и производите што се клучни за воените, разузнавачките, надзорните или сајбер-способностите на таквите земји“.
Брендови бараат дуќани во Скопје, се затвораат само неатрактивни објекти
Затворени дуќани буквално на секој чекор, објекти што некогаш биле маалски продавници под клуч, но и бели листови залепени на приземјата во зградите со ознака дека дуќаните се издаваат, се колорит во секој град од внатрешноста. Секако, не се исклучок ниту скопските населби, односно главниот град. Некои од дуќаните не работат со години, но повеќето се затворени во последните неколку години - особено по ковид-кризата и секако минатата година, кога цената на енергијата уриваше рекорди, па трошоците станаа неиздржливи.
Анализата на пазарот на малопродажен простор покажува дека клучните трендови сепак ги предводат развојот и отворањето на трговските центри. И не, интересот не е спласнат, туку, напротив, за атрактивните локации има голем интерес и побарувачка.
Зошто е добро да знаеме кои бои ни стојат убаво?
И за крај, затоа што е петок, нешто убаво. Ако сте го гледале филмот„Дневникот на Бриџит Џонс“, можеби се сеќавате на разговорот во кој мајката ја известува Бриџит дека ќе ја носи да ѝ се „средат“ боите затоа што повеќе не сака да ја гледа во нејасни матни нијанси. Бриџит е во шок, бидејќи постоењето на таква услуга ѝ било непознато, иако во Велика Британија дури повеќе од 35 години постојат лични консултанти за бои. Тоа порано важеше за престижна услуга, која главно ја користеа политичари, директори на големи компании и јавни личности за да го подобрат својот изглед и да ја зајакнат својата самодоверба кога се појавуваат во јавност.
Меѓутоа, во последно време, особено кај генерацијата зед (Z), експертската анализа на личните бои стана вистинска сензација, јавува репортерката на „Блумберг“ Сани Ким.
.webp){kind=icon}
