Климатските промени си го земаат данокот: земјотреси, пожари и поплави се дел од природните катастрофи што зачестија на европскиот континент. Природните катастрофи зад себе оставаат огромни штети, што ги поттикнува луѓето да размислуваат за осигурување на имотот. Од развиениот свет, Европејците се најмалку осигурени од такви појави.
Ги издвојуваме петте вести што треба да ги знаете на почеток на денот.
Осигурувањето имот во стагнација, природните катастрофи во пораст
Во Македонија најчесто се користи осигурувањето од пожар. Главно, со ваков тип осигурување се покриени имотите што се под хипотека кај банките затоа што полисата е обврзувачка за одобрување кредит. Од вкупно 12.286 склучени договори за осигурување имот во првата половина од оваа година, дури 9.881 покриваат само пожар. Во земјава, во август 2016 година, за време на поплавите за само два часа загинаа 22 лица, а беа поплавени над 7.000 дома.
Фед сака со трпение да ја победи рецесијата
Сè поголем број економисти - вклучувајќи и претставници на Федералните резерви - предвидуваат дека САД ќе избегнат рецесија, иако ќе може да здивнат дури до 2024 година. Од една страна, недоволно силен одговор на ценовните притисоци може да доведе до враќање на инфлацијата, што потоа ќе бара уште подрастични мерки. Студијата на поранешниот потпретседател на Фед, Алан Блиндер, за 11 циклуси на затегнување на монетарната политика од 1965 до 2022 година покажа дека четири обиди на Фед резултирале со меки приземјувања.
EЦБ во септември ќе ги зголеми каматните стапки за последен пат
Иако инфлациските притисоци се намалуваат, економистите сè уште очекуваат Европската централна банка (ЕЦБ) да испорача ново зголемување на каматните стапки следниот месец. Депозитната стапка ќе се зголеми на четири отсто во септември од сегашните 3,75 отсто, покажува истражувањето на „Блумберг“. Пазарот на пари проценува дека има 70 отсто шанси за зголемување на каматните стапки на ЕЦБ за 25 базични поени.
Bloomberg Mercury
Германската економија ќе стагнира до крајот на 2023 година
Очекувањата се дека германската економија ќе се намали за 0,3 отсто во 2023 година и веројатно ќе закрепне за само 0,8 отсто во 2024 година, што е намалување од претходната прогноза од еден отсто, велат економистите. Индустријата и понатаму се соочува со континуирана слабост поради малата побарувачка од Кина, недостигот од работна сила, построгата монетарна политика и долготрајните ефекти од минатогодишната енергетска криза.
„Амазон“ почна да ги опоменува работниците што работат оддома
Компанијата ќе преземе мерки за оние работници во САД што ги игнорирале упатствата за враќање во канцеларија, а ова е најновиот во низата примери на компании што се обидуваат да го намалат времето во кое вработените работат од далечина. Некои од вработените во „Амазон“ во САД минатата недела добиле електронска пошта во која се наведувало дека не ги исполнуваат очекувањата на компанијата да поминуваат најмалку три дена неделно во канцеларија, според копија од пораката до која „Блумберг“ имал увид. „Фајненшл тајмс“ претходно исто така објави за таквата порака.
.webp){kind=icon}