Индија стана првата земја што слета на јужниот пол на Месечината

Индија стана првата земја што слета со вселенско летало во близината на јужниот пол на Месечината, откако рускиот обид за слетување во истата област неодамна заврши неуспешно, по дефектот на моторот.

„Чандрајан-3“ (Chandrayaan-3), индиското вселенско летало што беше лансирано минатиот месец, оствари меко слетување во 18.04 часот по локално време во средата, откако руската „Луна-25“ се урна на Месечината во неделата. Роверот наречен „Прагјан“ (Pragyan), или мудрост, сега ќе треба да го анализира хемискиот состав на површината на Месечината и ќе бара вода во текот на еден лунарен ден, што е еквивалентно на 14 дена на Земјата.

Со овој подвиг Индија стана втората земја, покрај Кина, што ќе има оперативен ровер на Месечината.

Успешното слетување го зајакнува престижот на Индија во глобалната вселенска трка, откако земјата претрпе неуспешна мисија на Месечината во 2019 година. Премиерот Нарендра Моди сака да го зајакне местото на државата меѓу конкурентските земји за вселенски истражувања, а во јуни Индија ја потпиша „Артемис акордс“, иницијатива поддржана од САД со повеќе од дваесет други земји за управување со заеднички мисии и цивилно истражување на вселената.

Мразот присутен на неистражениот јужен пол на Месечината го поттикна интересот на земјите што ја истражуваат вселената, вклучувајќи ги САД и Кина. Тоа би можело да биде клучен ресурс за пиење, дишење и реален поттик за унапредување на човечкото истражување на вселената подлабоко во Сончевиот Систем.

Во моментов нема коментари за веста. Биди прв да коментира...

Остави коментар