.webp){kind=icon}
„Гугл“, член на „Алфабет“, отпушта стотина вработени што работат на неговиот дигитален асистент, хардвер и инженерски тимови за да продолжи со напорите за намалување на трошоците.
Засегнати се оние работници што работат на гласовниот асистент на „Гугл“ и тимот за проширена реалност. Погодени се и вработените во централниот инженерски оддел на компанијата, се наведува во соопштението на компанијата.
Намалувањето доаѓа бидејќи главниот бизнис за пребарување на „Гугл“ се соочува со конкуренција од вештачката интелигенција од „Мајкрософт“ и креаторите на ЧетГПТ од „Опен еј-ај“. На состаноците со инвеститорите, директорите на „Гугл“ ветија дека длабоко ќе ги анализираат нивните операции за да идентификуваат места каде што можат да ги намалат трошоците и да ослободат ресурси за инвестирање во нивните најважни приоритети.
Bloomberg
„Во текот на втората половина на 2023 година некои од нашите тимови направија промени за да станат поефикасни и со подобри перформанси и да ги усогласат своите ресурси со најважните производствени приоритети“, рече портпаролот на „Гугл“. „Некои тимови продолжуваат да прават такви организациски промени, вклучувајќи и некои кратења на работни места низ светот“.
Работниците се под притисок од јануари минатата година, кога матичната компанија „Алфабет“ објави околу 12.000 укинувања на работни места, што е повеќе од шест отсто од нејзината светска работна сила. Тоа предизвика потреси во Силициумската Долина. Сепак, компанијата продолжи со помали намалувања во текот на 2023 година, вклучувајќи и отпуштања на тимови за регрутирање, продуценти на вести и тимот за апликации за мапирање „Вазе“.
Додека главниот круг на намалувања беше најавен во јануари 2023 година од страна на извршниот директор на „Алфабет“, Сундар Пичаи, годинашните намалувања беа соопштени од лидери од пониско ниво, како што се потпретседателите и човечките ресурси, според изјавите на сегашен вработен и поранешен вработен.
И „Амазон“ неделава отпушти стотици вработени во бизнисот „Прајм видео“ и во студијата, што ги наметна прашањата дали е во тек уште една голема рунда на отпуштања во Силициумската Долина.
Работничкиот синдикат на „Алфабет“, кој претставува дел од своите вработени, го критикуваше кратењето на работните места во соопштение објавено на социјалната мрежа X, порано позната како Твитер.
„Нашите членови и тимови работат напорно секој ден за да создадат одлични производи за клиентите, а компанијата не може да продолжи да ги отпушта нашите колеги додека заработува милијарди во секој квартал“, велат од групата. „Нема да престанеме да се бориме додека не бидат безбедни нашите работни места“.
