Иран го нападна Израел со над 300 проектили и беспилотни летала

Израелската војска соопшти дека Иран синоќа лансирал околу 170 дронови, 30 крстаречки ракети и 120 балистички ракети кон израелската територија. Портпаролот на израелската војска Даниел Хагари рече дека биле пресретнати над 200 проектили и беспилотни летала односно дека повеќето од нив воопшто не стигнале до Израел.

Тој додаде дека нападот предизвикал мала штета во една од израелските воени бази. Засега нема информации за човечки жртви, а Израел веќе ги отвори цивилните аеродроми кои продолжуваат со работа.

„Подготвени сме за секоја закана што ќе дојде до Израел“, изјави Хагари.

Израел побара итен состанок на Советот за безбедност на Обединетите нации за да се осуди, како што ја нарече неговиот амбасадор во ОН „тешката и опасната ескалација“ од страна на Иран. Советот треба да се состане денеска во 16 часот по средноевропско време. Израелскиот амбасадор Гилад Ердан рече дека со нападот Иран ја прекршил повелбата на ОН и повика на акција за справување со заканата, иако договорза тоа се чини неверојатен со оглед на непријателството меѓу САД и Русија, две постојани членки на Советот со право на вето.

Инаку, иранската мисија во Обединетите нации, исто така, се обрати преку X со пост во кој се вели дека дека дејствијата на Техеран биле во легитимна одбрана и дека прашањето „може да се смета за завршено“. Иран ги предупреди САД дека „мора да се држат настрана“ од конфликтот.