Жолто ниво поради високи температури во Париз, закана за олимпијците

Француската метеоролошка агенција издаде предупредување за Париз и околните области за можно невреме и максимални температури од 35 Целзиусови степени што се очекуваат денеска во градот во кој се одржуваат Олимписките игри.

Агенцијата објави жолто ниво на опасност - второ од четирите нивоа - за главниот град, додека топлотниот бран носи високи температури и во другите олимписки места низ Франција.

Уште повисоко - портокалово предупредување - во сила е за Бордо и Лион, каде што вчера температурите достигнаа близу 40 Целзиусови степени, кое ќе остане во сила и денеска, кога во овие градови ќе одржат олимписки фудбалски натпревари.

Жолто ниво за Париз беше издадено особено затоа што се предвидува дека „многу топлите“ услови ќе останат во текот на ноќта, при што живата не се очекува да падне под 22 Целзиусови степена помеѓу вторник и среда. Тоа умерено ниво на тревога значи дека луѓето треба да „бидат внимателни“ на влијанието на топлината кога спортуваат или се занимаваат со друга физичка активност, велат од агенцијата.

Жештината силно ќе ја почувствуваат олимпијците што се натпреваруваат во настани на отворено во текот на попладневните часови во Париз и неговите околни предградија.

Условите би можеле да бидат уште потешки кога Шпанија ќе се натпреварува со Египет во фудбал денеска попладне во Бордо. Метеоролошката агенција соопшти дека температурите би можеле да достигнат до 38 Целзиусови степени во југозападниот град.

Слични високи прогнози има и за Лион, каде што фудбалерите на Украина денеска ќе играат против Аргентина.

Во централниот град Шатору, кој е домаќин на олимписки стрелачки натпревари, температурите денеска би можеле да достигнат 36 Целзиусови степени, соопштија синоптичарите.

Во пресрет на Игрите, некои спортисти побараа да се приспособи тајмингот на настаните и да се земат предвид високите температури и ризикот од топлотен удар.

Во моментов нема коментари за веста. Биди прв да коментира...

Остави коментар