.webp){kind=icon}
Стопанската комора на Србија (ПКС) наскоро ќе отвори претставништво во Скопје за да обезбеди уште посилна поддршка за зајакнувањето на економските врски меѓу двете земји и да покаже дека Србија и Северна Македонија се вистински примери за успешна регионална соработка без бариери.
Добро утро, подолу петте вести што ги издвоивме за почеток на денот.
На краток рок шопингот лекува, на долг - среќата не се купува
Дали шопингот има терпаветско дејство? Купувањето нешто ново, честопати непотребно, до скоро се сметаше дека го подобрува расположението. Најновите истражувања одат во спротивен правец. Минатиот ноември, академици од Универзитетот во Мелбурн и Австралискиот национален универзитет открија дека практикувањето минимализам може да ја подобри благосостојбата.
Тие откриле дека луѓето кои стекнале навика помалку да трошат се чувствуваат посреќни и помирни. Тоа го намалува „менталниот неред“ и ја подобрува нивната лична благосостојба. Други претходни истражувања покажале слични резултати. Студијата на Универзитетот во Аризона од 2019 година – која била спроведена врз 968 млади луѓе од првата година на колеџ до две години по дипломирањето – покажа дека оние кои заштедувале пари со тоа што не трошеле непотребно, генерално биле посреќни и трпеле помалку психолошки стрес.
Драстични разлики во цените на храната во македонските градови
Македонските граѓани во изминатиов период беа изложени на рекордна инфлација, којашто предизвика значителен пораст на цените на основните прехранбени производи. Во услови на енормни поскапувања анализиравме дали и колку местото на живеење игра улога во инфлаторниот удар односно дали и колкави разлики има во висината на цените на храната во поголемите градови во Македонија.
Наодите се изненадувачки со оглед на тоа што од град до град има енормни разлики во цените на исти производи. Најновите податоци на Државниот завод за статистика за цените на мало откриваат дека граѓаните на Тетово јадат најскап грав во Македонија иако станува збор за град кој е познат токму по „тетовското гравче“. Во јули годинава килограм грав во Тетово чинел 282 денари, што е убедливо највисока малопродажна цена во споредба со цените во сите други поголеми градови во Македонија.
„Фолксваген“ ризикува штрајк на 500.000 луѓе поради затворањето на фабриките
Компанијата „Фолксваген“ (Volkswagen AG) би можелa да се соочи со штрајкови уште во октомври доколку одлучи да го укине деценискиот договор за безбедност на работните места и да затвори две фабрики, соопшти најголемиот синдикат во земјата. „Сигурното вработување е дел од основниот договор што беше направен со компанијата, особено за кризи како оваа“, рече на прес-конференција во четвртокот Торстен Грогер, главен преговарач на „ИГ метал“ (IG Metall), кој е задолжен за „Фолксваген“.
„Повеќе од 500.000 работници би можеле да учествуваат во штрајкови на крајот на следниот месец доколку ’Фолксваген’ не започне конструктивни преговори“, додаде Грогер. Додека синдикатот се држи до барањата платите во автомобилската индустрија да се зголемат за седум отсто, шефицата на „ИГ метал“, Кристијане Бенер, говорејќи на истиот настан, рече дека преминување на четиридневна работна недела би било опција на која работниците би можеле да се согласат.
По падот на цената, ОПЕК+ сака да го одложи зголемувањето на понудата на нафта
ОПЕК+ е блиску до договор за одложување на планираното зголемување на производството на нафта откако цените паднаа поради кревката побарувачка. Клучните членови на групата веројатно нема да продолжат со планираното зголемување од 180.000 барели дневно во октомври, рекоа делегати што побараа да останат анонимни бидејќи дискусиите се приватни.
Тие исто така разговараат за одложување на сличните месечни зголемувања, кои се исто така закажани за годинава, рече еден делегат. Разгледувањето на одлуката дојде откако цената на суровата нафта падна под 73 долари за барел во текот на неделава, достигнувајќи го најниското ниво од крајот на 2023 година, и по лошите економски податоци од Кина и САД, кои инаку се најголеми потрошувачи.
Самостојното управување на „Тесла“ наскоро достапно во Кина и Европа
„Тесла“ (Tesla) планира да го лансира напредниот систем за помош на возачот, кој го нарекува „фул селф драјвинг“ (Full Self Driving / FSD) технологија, во Кина и Европа во првиот квартал од следната година, под услов да ги добие потребните регулаторни одобренија. Официјалниот налог на платформата X на „Тесла еј-ај“ (Tesla AI), подружница на производителот на електрични возила, во четвртокот објави план за лансирање на претстојните технологии.
Најавата покажува дека „Тесла“ е блиску до добивање дозволи за оваа технологија, што ја гледа како можност за зголемување на продажбата и одржување на предност во однос на кинеските конкуренти, кои исто така развиваат слични системи за асистенција на возачот. „Тесла“ постигна значителен напредок во добивањето одобренија за кинескиот пазар, откако успешно ги помина проценките за безбедноста на податоците.
