„Ролекс“ сега и официјално продава половни часовници, но тоа ќе ве чини

Во главната бутик-продавница на „Бухерер“ (Bucherer AG) во Женева речиси секој што бара нов „ролекс дејтона“ (Rolex Daytona) најверојатно ќе биде разочаран.

Нема во резерва и листите за чекање можат да траат со недели, месеци, па дури и години. Но ако се искачите до четвртиот кат од продавницата, што е во сопственост на „Ролекс“ (Rolex), можеби ќе имате среќа - ако сте подготвени да купите користен часовник и да платите многу повеќе за него.

Сличен модел од 2020 година со платинестиот „ролекс дејтона“, со светлосин бројчаник и кафена керамичка рамка, кој е наведен како нов (но недостапен) за 74.400 швајцарски франци (87.600 долари) на приземјето, може да се купи користен за 110.000 франци на четвртиот кат.

Тоа е речиси 9.000 франци плус за секој кат што ќе го искачите, но за купувачите тоа вреди, бидејќи компанијата што ги произведува веројатно најпосакуваните часовници во светот сега е дел од бизнисот со користени часовници.

Bloomberg

„Ролекс“ ја нарекува програмата „Сертифицирано користено“ (Certified Pre-Owned), но за купувачите најважно е да знаат дека часовникот што го купуваат дефинитивно е од „Ролекс“, а не фалсификат.

„Ова веројатно е најзначајниот потег што производител може да го направи за да го легитимира секундарниот пазар“, вели Џошуа Ганџеи, извршен директор на „Јуропиан воч компани“ (European Watch Company) со седиште во Бостон. Колекционерите што „ќе почнат со оваа програма брзо ќе сфатат дека секундарниот пазар може да понуди фантастични можности кога купуваат од доверлив извор“.

За „Ролекс“, кој е познат по традицијата и доследноста, преминот кон бизнисот со користени часовници пред нешто повеќе од една година беше радикален чекор. Тоа исто така дојде набрзо по уште едно изненадување - нивното влегување во малопродажба со купувањето на „Бухерер“, бизнис со проценета капитална вредност од над 4 милијарди франци во тој период, според „Вонтобел“ (Vontobel).

Програмата „Сертифицирано користено“ ѝ дава на швајцарската фирма директен пристап до пазар што се проценува на 20 милијарди долари во целина и се очекува да порасне на 35 милијарди до 2030 година, според „Дилојт“ (Deloitte).

Тоа значи дополнителен извор на приходи во време кога пазарот на луксузни часовници се спушта од врвовите на последните неколку години. Швајцарските производители на часовници се толку загрижени што дури повикуваат на владина помош.

И покрај големината на пазарот со користени часовници, „Ролекс“ долго време се држеше настрана.

Постојат голем број легитимни продавачи, но тоа е честопати матен бизнис, каде што купувачите треба да се потпрат на довербата. Пазарот е преполн со фалсификати, дури и во својата најстереотипна фигура - сомнителен тип што вели: „Сакаш да купиш часовник?“ додека открива редови часовници што висат во внатрешниот дел од неговиот мантил.

Како одговор на прашањата, претставници на „Ролекс“ во Женева изјавија дека програмата има цел да им овозможи на купувачите „можност да купат официјално користени часовници, при што ќе имаат корист од квалитетот и извонредноста, кои се интегрален дел од брендот“.

Продавачите се соочуваат со неколку пречки во проширувањето на овој нов пазар. Една од нив е пронаоѓањето доволно часовници за да можат техничарите на „Ролекс“ да ги проверат и валидираат, и покрај тоа што во оптек има околу 30 милиони парчиња.

Тука е и прашањето за профитабилноста. Овластените продавачи обично заработуваат бруто-маржа од повеќе од 30 отсто на нов „ролекс“. За користени часовници, таа е значително помала. Цените исто така мора да го одразуваат надоместокот на „Ролекс“ за автентикација, кој типично изнесува околу 10-15 отсто од продажната цена, според Џон Шмерлер, извршен директор на „1916 компани“ (The 1916 Company), продавач што е дел од официјалната програма на „Ролекс“.

Продавачите им наплаќаат значителни премии на купувачите за сертифицираните часовници. Според аналитичката компанија „Воч чартс“ (WatchCharts), цените во програмата за користени часовници во „Бухерер“ во Европа се околу 36 отсто повисоки од другите користени часовници „ролекс“ на почетокот од септември. Во „Вочес оф Свицерланд“ (Watches of Switzerland) во САД, разликата е 42 отсто. Во меѓувреме, премијата од овластената програма наспроти неовластените часовници кај „1916 компани“ беше само 15 отсто.

Часовничар проверува часовник „ролекс“ за трговец на мало што се занимава со претходно користени луксузни стоки во Токио Bloomberg

„Купувачите добиваат добра зделка во смисла на спокојство“, вели Џон Шмерлер.

„Ролекс“ е далеку најголемиот швајцарски бренд за часовници, произведувајќи повеќе од еден милион парчиња годишно.

На секундарниот пазар, неговата доминација е уште поизразена. На индексот Subdial Watch на „Блумберг“, кој ги следи цените за 50-те најтргувани модели според вредноста, 45 се од „Ролекс“. Преостанатите модели се од „Патек Филип“ (Patek Philippe) и „Одемар Пиге“ (Audemars Piguet).

Многу продавачи гледаат на овластената програма како можност за раст. Побарувачката за повеќето нови модели „ролекс“ сè уште ја надминува понудата, создавајќи прилив од очајни потенцијални купувачи.

„Вочес оф Свицерланд“ изјави дека програмата на „Ролекс“ брзо станала нивната втора најголема категорија според продажба, веднаш зад новите часовници „ролекс“. Од „1916 компани“, која на својата веб-страница на продажба има околу 800 половни часовници „ролекс“ од овластената програма, очекуваат дека бизнисот ќе порасне од 25 до 30 отсто во блиска иднина.

Но, ако „Ролекс“ сака да го потресе целиот пазар на користени часовници и да добие поголема контрола врз препродажбата и цените, тоа ќе биде предизвик. Засега, часовниците што се продадени преку неговата програма сочинуваат само еден отсто од вкупниот пазар за користени часовници „ролекс“.

„Да се мисли дека брендот може да ги контролира цените на секундарниот пазар само со влегување на тој простор е многу кратковидо“, вели Џошуа Ганџеи. „Додека часовниците од овластената програма постигнуваат значителна премија во однос на традиционалните секундарни цени, потрошувачите чувствителни на цената ќе продолжат да бараат подобри понуди од други доверливи продавачи“.