Наскоро аукција на првиот „ролекс“ со боите на виножитото

Првиот хронографски часовник „ролекс рејнбоу дејтона“ (Rolex 'Rainbow' Daytona) е на пат да оди на аукција и би можел да се продаде за повеќе од 3,5 милиони долари. „Ролексот“ од 1990-тите ќе се продава на аукција на 8 ноември во Женева. Иако аукциската куќа „Филипс“ (Phillips) направи необичен потег да не постави висока почетна цена за часовникот, се очекува тој да се продаде за најмалку 3 милиони швајцарски франци (3,5 милиони долари).

„Се верува дека овој часовник е првиот примерок со познатите скапоцени камења ’рејнбоу’ произведен од швајцарскиот производител на часовници“, посочуваат од „Филипс“. Овој примерок со рамка украсена со сафири во различни бои беше во приватна колекција речиси две децении.

„Овој часовник е голема работа“, рече во интервју Александар Готби, шеф за часовници за Европа и Блискиот Исток во „Филипс“. „Само неколку колекционери на 'ролекс' знаеја дека овој часовник постои“, додаде тој.

Часовникот се продава во време на предизвик за индустријата, бидејќи побарувачката за скапи часовници опадна поради високата инфлација и по невидениот раст за време на пандемијата на ковид-19.

Сепак, ретките и уникатни модели на швајцарски брендови сè уште се на цена. Во мај минатата година „Филипс“ продаде златен „ролекс 6270 космограф дејтона“ (Rolex 6270 Cosmograph Daytona) од 1988 година, со бројчаник и рамка обложени со дијаманти, за речиси 4 милиони швајцарски франци.

„Часовникот 'рејнбоу дејтона' означува важен момент во историјата на 'Ролекс', бидејќи брендот ја покажа својата способност да создава часовници од највисоко ниво, користејќи иновативни техники за поставување скапоцености, како кај накитот“, рече Готби.

Во времето кога е направен овој часовник, во 1993 или 1994 година, „Ролекс“ сè уште беше широко признаен како производител на луксузни спортски часовници, како што е челичниот „сабмаринер“ (Submariner) наменет за нуркање.

Иако овој часовник „рејнбоу“ бил направен како уникатно парче во 1990-тите, за клиент од Блискиот Исток, истата шема на сафир повторно била користена на некои модели на „дејтона“ две децении подоцна.

Денес стилот на поставување скапоцени камења во боите на виножитото може да се види и на модели од други луксузни брендови, како „Патек Филип“ (Patek Philippe) и „Одемар Пиге“ (Audemars Piguet). Техниката останува исклучително напорна, делумно затоа што бара скапоцени камења со прецизни градации на бои за да ги доловат боите на виножитото.

Иако сè уште е редок и е тешко да се најде кај трговците на мало, „рејнбоу дејтона“ сега стана препознатлив модел во колекцијата на „Ролекс“.