Краток преглед на светските вести: Во Кина празник, на Блискиот Исток ескалација

ПОЛИТИКА

Израел

Израелските сили објавија дека започнале „целни и ограничени напади“ во јужен Либан, што дополнително го ескалира конфликтот со Хезболах. И покрај меѓународните апели за воздржаност, израелските одбранбени сили рекоа дека се насочиле на цели „лоцирани во селата блиску до границата“ што „претставуваат непосредна закана за израелските заедници во северен Израел“. Тие напади ја проширија кампањата против Хезболах, откако Израел претходно го уби лидерот на групата Хасан Насрала.

Тим Волц, кандидатот за потпретседател на Камала Харис, и Џеј Ди Венс, кој е на листата на републиканецот Доналд Трамп, денеска ќе ја имаат првата и единствена ТВ-дебата пред претседателските избори во САД во ноември. Дебатата ќе започне во 21 часот по локално време на ТВ-мрежата „Си-би-ес“ (CBS) и ќе трае 90 минути. Истражувањето на АП и Американскиот центар за гласање покажува дека гласачите го претпочитаат Волц, додека половина од регистрираните гласачи имаат неповолно мислење за Венс, републиканец.

ЕКОНОМИЈА

Џером Пауел за натамошното олабавување на монетарната политика

На монетарниот фронт, претседателот на Федералните резерви (Фед), Џером Пауел, рече дека централната банка ќе ги намали каматните стапки со текот на времето и нагласи дека целокупната американска економија останува на цврста основа. Тој исто така го повтори своето верување дека инфлацијата ќе продолжи да се движи кон целта на Фед од два процента, додавајќи дека економските услови „го поставија темелот“ за натамошно ублажување на ценовните притисоци.

Во пресрет на објавувањето на најновите податоци за инфлацијата во еврозоната, зборуваше и претседателката на Европската централна банка (ЕЦБ), Кристин Лагард. Таа рече дека Европската централна банка станува сè пооптимистична околу задржувањето на инфлацијата под контрола, а тоа ќе се одрази и на одлуката за каматната стапка во октомври. „Инфлацијата би можела привремено да забрза во четвртиот квартал од годинава, но најновите настани ја зајакнуваат нашата верба дека таа навремено ќе се врати на целта“, рече Лагард во обраќањето пред пратениците во Европскиот парламент во Брисел.

БЕРЗИ

Европа

Фјучерсите на европските берзи утрово се тргуваат мешано, пред објавувањето на прелиминарните податоци за инфлацијата во еврозоната за септември.

Потсетуваме, европските акции вчерашното тргување го завршија во минус, иако инфлацијата во Германија, Шпанија и во Франција падна под два отсто.

САД

И фјучерсите на американските индекси флуктуираат меѓу добивки и загуби, откако првиот човек на Фед најави дополнителни намалувања на стапките. Во исто време Џером Пауел најави враќање на монетарната политика во понеутрален став. Цените на нафтата не се променија значително по малиот пораст во понеделникот.

Азија

Кога станува збор за акциите во азиско-пацифичкиот регион, четвртиот квартал го започнаа главно во зелено, додека послабиот јен ја крена вредноста на јапонските акции. Пазарите во Кина и во Хонгконг се затворени поради празници. Па така, кинеските пазари ќе бидат на неделна пауза, откако вчера забележаа најголем скок во последните 16 години.