Трамп продава часовници од 100.000 долари. Вреди ли да се купат?

Во четвртокот поранешниот американски претседател Доналд Трамп на својата платформа „Трут сошл“ (Truth Social) објави дека започнува продажба на официјалната Трамп колекција на часовници. Достапни на страницата GetTrumpWatches.com, цените на овие часовници се движат од 499 до 799 долари за автоматските часовници со сребрен и златен тон до 100.000 долари за часовници од масивно злато и посложени компликации. Сите часовници се во ограничено издание, а поевтините модели „фајтер“ (Fighter) се достапни во серија од 1.000 парчиња, додека секоја од трите поскапи линии „виктори турбијон“ (Victory Tourbillon) е ограничена на 147 нумерирани парчиња, што јасно се поврзува со позицијата на 47. претседател на Соединетите Американски Држави, за која Трамп повторно се кандидира.

Трамп, се разбира, го поседува златножолтиот модел „виктори“ со број 1.

Трамп „виктори“ часовник gettrumpwatches.com

Часовниците „фајтер“ на бројчаникот го имаат потписот на Трамп во злато, додека на моделите „виктори“  потписот се наоѓа на задниот дел, на златен диск што може да се отстрани за да се открие сафирниот заден капак, преку кој може да се видат внатрешните механизми на часовникот.

 

 

Дали 100.000 долари е премногу за ваков часовник? Да.

Очигледно, главниот аргумент за таквата висока цена е дека станува збор за ограничено издание на Трамп меморабилија, па одредени негови обожаватели можеби ќе платат толку многу. Тоа изгледа како нешто што самиот Трамп би го носел и навистина поседува некои одлични часовници од брендови како „Патек Филип“ (Patek Philippe), „Ролекс“ (Rolex) и „Вашерон Константин“ (Vacheron Constantin).

„Секој часовник ќе биде нумериран и ќе содржи персонализирана порака од страна на претседателот Трамп“, се наведува на веб-страницата. Плус: „Ние исто така прифаќаме биткоин како начин на плаќање!“

Без поврзаноста со Трамп, маркетингот за часовникот „виктори“, кој се навива рачно, ја оправдува високата цена делумно поради тоа што куќиштето и белезицата се направени речиси целосно од 18-каратно злато (розово или жолто) и имаат 122 мали дијаманти на рамката и на држачите. А искрено, блескавите златни часовници моментално се во тренд. Но, може да купите „ролекс деј дејт“ (Rolex Day Date) од масивно злато со дијаманти за околу 60.000 долари, и тоа од најголемиот производител на часовници во светот.

Линијата на часовници „фајтер“ gettrumpwatches.com

Другиот аргумент за високата цена е турбијонската компликација. Турбијонот е ротирачка конструкција, која постојано врти важен дел од механизмот на часовникот (рамнотежното тркало, спрегата и балансната пружина) за да спречи гравитацијата да влијае на точното мерење на времето. Уредот бил измислен во 1801 година од Абрахам-Луис Бреге, кој им продавал часовници на Наполеон и на Марија Антоанета. Турбијонот е сложен и тешко се произведува и одржува, па затоа часовниците со ваква функција обично се скапи.

Но од солиден швајцарски бренд како што е „Фредерик Констан“ (Frederique Constant), кој ги произведува своите механизми во сопствените фабрики, можете да добиете часовник со турбијон за околу 15.000 долари.

Часовниците на Трамп, кои ги продава компанија наречена „Бест вочес“ (BestWatchesOnEarth LLC) и која го лиценцираше името Трамп, изгледа дека имаат швајцарски механизми и куќишта купени од рафтовите. Ова е доста вообичаено - ако сакате да научите како една добра американска компанија „произведува“ швајцарски часовници, можете да го прочитате нашиот новинарски билтен. Но часовниците произведени на овој начин обично не достигнуваат шест цифри.

Веб-страницата GetTrumpWatches.com предупредува дека „сликите се прикажани за илустративни цели и можеби не се точна репрезентација на производот“, така што навистина не знаеме дали часовниците ќе изгледаат луксузно или ќе имаат добра завршница. Многу добра верзија на оваа комбинација, часовник од бело злато со турбијон и (поголеми) дијаманти на бројчаникот, направен од врвниот бренд „Одемар Пиге“ (Audemars Piguet), ќе ве чини 240.000 долари.

Дали се запрашувате кои други часовници можете да купите за цената на „виктори“? Еве четири многу посакувани примери меѓу љубителите на часовници, од врвните швајцарски брендови во индустријата, кои можете да ги набавите за помалку пари.

„Ролекс платинум космограф дејтона“ (Rolex Platinum Cosmograph Daytona) - 77.800 долари

Rolex

Нов од 2023 година, овој масивен часовник направен од платина е во една од најпосакуваните линии на „Ролекс“ и има впечатлив леденосин бројчаник и кафеава рамка.

„Вашерон константин оверсис хронограф“ (Vacheron Constantin Overseas Chronograph) - 79.500 долари

Vacheron Constantin

Овој „оверсис“ од розово злато со зелен бројчаник беше дел од нова линија што излезе годинава. Комбинацијата на розово и зелено беше најголемиот тренд годинава.

„Патек филип роуз голд наутилус“ (Patek Philippe Rose Gold Nautilus) - 85.900 долари

Patek Philippe

Не е лесно да се добие часовник како овој од овластен дилер на „Патек“, но поседувањето на кој било „наутилус“ доаѓа со вечно право на фалење.

„Одемар пиге ројал оук хронограф“ (Audemars Piguet Royal Oak Selfwinding Chronograph) - 78.200 долари

Audemars Piguet

Како и часовниците на Трамп, овој „златно на златно“ блескав модел ќе привлече внимание каде и да се појавите.

Во моментов нема коментари за веста. Биди прв да коментира...

Остави коментар