ПОЛИТИКА
Трамп: Тарифа ми е омилен збор
Републиканскиот претседателски кандидат Доналд Трамп ги бранеше своите планови за реорганизација на американската економија преку драматично зголемување на царините и подиректни консултации со Федералните резерви (Фед). Во интервју за „Блумберг“ (Bloomberg), Трамп исто така тврди дека неговите политики ќе доведат до значителен раст, и покрај проекциите дека неговата агенда може да ја поттикне инфлацијата и да го зголеми националниот долг.
„Таквите мерки ќе имаат огромен ефект, позитивен ефект“, рече Трамп во разговор со главниот уредник на „Блумберг“, Џон Миклетвејт, во Економскиот клуб во Чикаго. Поранешниот претседател ја отфрли можноста предложените тарифи да ги нарушат синџирите на снабдување или да извршат притисок врз малите бизниси, тврдејќи дека компаниите брзо ќе го вратат производството во САД за да ги избегнат тарифите.
ЕКОНОМИЈА
Силен квартал за банките на Волстрит
Најнестабилниот квартал од екот на пандемијата им донесе неочекуван приход на банкарските гиганти на Волстрит. Така, „Голдман Сакс“ (Goldman Sachs), „Банката на Америка“ (Bank of America), „Ситигруп“ (Citigroup) и „ЏП Морган“ (JPMorgan Chase) објавија заработка од тргување со акции што ги надминаа процените на аналитичарите, пишува „Блумберг“. Приходите во секторот инвестициско банкарство ги надминаа и проекциите на аналитичарите, а нето-приходите од камати беа над очекувањата.
Европската централна банка в четврток одлучува за каматните стапки
Европската централна банка (ЕЦБ) на состанокот в четврток ќе ги намали каматните стапки за 25 базични поени, прогнозираат аналитичарите на „Блумберг Адрија“. Потоа, каматната стапка на депозитите би изнесувала 3,25 отсто, која е најниска од јуни 2023 година. Европските централни банкари исто така би можеле да ги намалат каматните стапки во декември, особено ако продолжат лошите трендови во индустрискиот сектор, според нашите аналитичари.
БИЗНИС
„Дел“ испорачува сервери со чипови од „Енвидија“
На корпоративен план, американската компанија „Дел“ (Dell) наскоро ќе започне со испорака на сервери што содржат чипови „блеквел“ (Blackwell). Серверите ориентирани кон вештачката интелигенција ќе им бидат испорачани на одредени клиенти следниот месец, а за пошироката јавност ќе бидат достапни во почетокот на 2025 година, соопштија од „Дел“.
БЕРЗА
Европа
Во продолжение следува преглед на состојбата на глобалните пазари на капитал. Фјучерсите на европските акции утрово се тргуваат претежно во минус, во пресрет на утрешната одлука на Европската централна банка за каматните стапки. Економистите на „Блумберг“ очекуваат централната банка да ги намали каматните стапки за 25 базични поени третпат по ред, бидејќи ризиците од инфлација продолжуваат да се намалуваат.
Во вторникот акциите на европските берзански индекси завршија со тргување во минус. Индексот Euro Stoxx 600, кој го следи работењето на 600-те најголеми компании во 17 европски земји, падна за 0,8 отсто, германскиот DAX падна за 0,11 отсто, лондонскиот берзански индекс FTSE падна за 0,52 отсто, додека падот на францускиот CAC изнесуваше 1,05 отсто.
САД
И фјучерсите на американските индекси се тргуваат мешано, откако вчерашното тргување заврши претежно со загуби. Во исто време претседателот на филијалата на Фед во Атланта, Рафаел Бостик, изрази очекување дека американската економија ќе забави годинава, како и дека надолниот тренд на инфлацијата може да се соочи со одредени тешкотии.
Индексот S&P 500 падна за 0,76 отсто, индексот Nasdaq 100 за 1,01 отсто, додека индексот DJIA падна за 0,75 отсто или за повеќе од 300 поени.
Глобалната референтна вредност на нафтата брент во вторникот се намали за 3,5 отсто и падна под 75 долари за барел. Да потсетиме дека цената на нафтата почна да расте пред две недели, односно кога ескалираа конфликтите меѓу Израел и групата Хезболах, која ја поддржува Иран. Минатата недела брентот достигна и до 80 долари за барел.
Азија
Кога станува збор за акциите во азиско-пацифичкиот регион, тие се движат помеѓу добивки и загуби. Индексот MSCI трет ден по ред е во пад, а во минус се и акциите во Сиднеј, Токио и во Сеул. Од друга страна, акциите во Кина се тргуваат мешано, во пресрет на утрешната прес-конференција и на подетални мерки за поддршка на ослабениот сектор на недвижности.
.webp){kind=icon}
