Под насловот „Back to business: Економски потенцијал и развојни можности за Македонија“ во Скопје се одржа првата годишна конференција на „Блумберг Адрија“. Конференцијата ја отворија премиерот Христијан Мицкоски и Јелисавета Лазаревиќ, директорка за содржина на „Блумберг Адрија“.
Говорејќи за стратегиските приоритети на Владата во областа на економијата, Мицкоски посочи дека како држава треба да бидеме тројна раскрсница во регионот.
„Ние немаме излез на море, ниту природни ресурси, како нафта и гас, и тоа се недостатоци. Умешноста е ние да ги претвориме тие недостатоци во предности, да се поставиме стратегиски и другите да гледаат во нас како партнер каде што може да вложуваат. Наша предност се трите основни столба: како да бидеме раскрсница за транспортен, железнички и енергетски пат“, посочи премиерот.
Според директорката за содржина на „Блумберг Адрија“, Јелисавета Лазаревиќ, развојот на новите технологии и промените што се случуваат во глобалната економија ќе донесат поголеми промени, отколку во претходните 100 години.
Promo/Bloomberg Adria
„Кога зборуваме за бизнис, всушност зборуваме за фактот дека дефинитивно живееме во свет каде што во наредниот период развојот на новите технологии и промените што се случуваат во глобалната економија ќе донесат поголеми и побрзи промени отколку што беше случај во претходните 100 години“, истакна Лазаревиќ.
Фокусирајќи се на македонскиот реален сектор, говорниците од првата панел-дискусија говореа за новите технологии, бизнисот во турбулентно време, промените на стопанството за подобар раст на македонската економија, како и за тоа дали како земја ги следиме светските трендови и сме во тек со новите технологии. Тие велат дека од државата очекуваат фокусирање на реализацијата на капиталните инвестиции затоа што од тоа ќе зависи и економскиот раст. Една од темите на кои беше ставен фокусот и за што сите говорници беа согласни е инвестирањето во нови технологии.
Генералната директорка на „Макстил“, Марија Дуковска-Павловска, вели дека иако челичната индустрија е стара и традиционална, автоматизацијата исто така станува реалност.
Promo/Bloomberg Adria
„Прво се прашуваме дали работната позиција е високоризична бидејќи се работи во една таква средина во која има големи ризици, високи температури, во секој момент има можност од некаква опасност. Оттука, тоа е првото прашање што си го поставуваме при носењето одлука каде и во што да инвестираме и каде и што да автоматизираме. Со автоматизацијата неминовно доаѓа до подобрување на безбедноста. Исто така имаме заштеда и на енергенти, сето тоа придонесува за зголемување на продуктивноста“, вели таа.
Дигитализацијата и дигиталната трансформација се веќе завршена приказна и живееме во дигитален свет, вели Методија Мирчев, главен извршен директор на А1.
Promo/Bloomberg Adria
„Сакале или нејќеле, ние веќе имаме дигитален идентитет во тој дигитален свет. Таа технологија забрзува експоненцијално и, практично, како што поминува времето така новите технологии почнуваат да стануваат секојдневие“, вели Мирчев.
Фокусот на втората панел-дискусија беше пристапот до пари во услови на глобални промени и кој го финансира растот, каде што беше потенцирано дека банкарскиот сектор е дефинитивно финансискиот сектор во кој нашата земја има интерес за стекнување или основање бизнис.
„Интерес има голем. Тука доаѓа прашањето зошто нема трансакции. Основната причина зошто нема нови трансакции се преголемите ценовни очекувања на сопствениците на банките“, вели Мирослав Марчев, управен партнер за Северна Македонија во ПвЦ (PwC).
Марчев додава дека кога станува збор за продажба на бизнисите, инвеститорите најмногу сакаат да ги продадат бизнисите што ги имаат во осигурителниот сектор, но, за жал, за тоа нема интерес.
Марија Томеска, претседателка на Управниот одбор на „Еуролинк осигурување“, зборувајќи за начинот на кој осигурувањето придонесува за развојот на економијата, истакна дека осигурителната индустрија е таа што ги охрабрува инвеститорите да инвестираат.
Во однос на прашањето за улогата на банките во напорите за зголемување на економскиот раст во Македонија, Тони Стојановски, претседател на Управниот одбор на „НЛБ банка“, посочи дека во изминатиот период стапката на економски раст беше исклучително ниска односно негативна ако се земе предвид стапката на инфлација. Тој додаде дека во такви услови во Македонија имаше кредитен раст што некаде од почетокот на годината беше околу четири проценти, потоа забрза на некои шест-седум проценти и се очекува да дојде до осум-девет проценти годинава.
Тој посочи дека е важно стапката на корпоративно кредитирање да оди нагоре, но дека тоа не може да произлезе само од банките што имаат капацитет, поставени цели и бизнис-планови за експанзија, туку дека е потребно да се создадат услови како што се предвидливост за бизнис-заедницата и владеење на правото и институциите за да се забрзаат инвестициите.
Сопственикот на „Божиновски часовници и накит“, Игор Божиновски, смета дека ваквиот тип конференции е од големо значење за компаниите и за развојот на земјата. Меѓутоа, Божиновски како недостиг во нашата земја го наведе немањето такс фри, кое, според него, е еден огромен генератор за економскиот развој на земјите.
Promo/Bloomberg Adria
„Дваесет и четири години ние го имаме Законот за такс фри. Во 2000 година е донесен Законот за ДДВ и во дел од тој закон е опфатен и повратот на данок на странски туристи, меѓутоа тоа не е спроведено кај нас“, вели Божиновски.
.webp){kind=icon}
