Скопје утрово е без градски превоз, ЈСП остана без нафта

Скопје и утрово остана без градски превоз поради недостиг од нафта за автобусите на Јавното сообраќајно претпријатие (ЈСП). Проблемот почна вчера попладне, кога во сообраќај останаа само 25 автобуси што користат метан. Другите автобуси се паркирани во базите во Автокоманда и во Ѓорче Петров.

Една од причините за недостигот на нафта е поништената јавна набавка од страна на Бирото за јавни набавки. За поништувањето на набавката градот, преку соопштение, го обвини Бирото дека креира криза за гориво во ЈСП, со тоа што „за првпат од постоењето на претпријатието ја поништи редовната јавна набавка за гориво во ЈСП како смислено сценарио“.

Според претседателот на Независниот синдикат на возачите во ЈСП Скопје, Африм Муча, состојбата е алармантна. Во моментов речиси 70 проценти од возилата се паркирани. Во изјава за МИА тој синоќа истакна дека во моментов по скопските улици сообраќаат мал број двосменски автобуси што имаат наточено нафта пред два дена, како и возилата со ТНГ.

„За нормално функционирање на ЈСП на дневна основа се потребни 25 тони нафта, која не ја добиваме. Нафтата вообичаено ни ја доставува ’Пуцко петрол’ во базите на ЈСП Скопје, но бидејќи должиме поголема сума пари, деновиве не ни доставува нафта“, изјави тој.

На Скопје му фалат 200 автобуси

Според Миќо Стојановски, пак, од ССМ ЈСП Скопје, причина за колапсот на градскиот превоз е односот меѓу градоначалничката Данела Арсовска, претседателот на Советот на Град Скопје, Трајко Славески, и Советот на Град Скопје.

„Имаше најава од Град Скопје дека ќе се нормализира дотурот на нафта за ЈСП, но тоа не се случува. Проблеми со нафта има и ЈП ’Комунална хигиена’ Скопје, поради што само дел од камионите собира смет. Затоа сите синдикати на јавните градски претпријатија планираме од понеделник да одржиме заеднички состанок на кој ќе одлучиме какви мерки ќе преземеме“, изјави Стојановски за МИА.

Независниот синдикат на возачите во ЈСП Скопје од петок ќе одлучи какви натамошни постапки ќе преземе доколку не се среди состојбата во јавното градско претпријатие.

Ниту приватните превозници не работат во согласност со возниот ред поради ненамирени долгови од страна на Градот.

Компаниите „Јофи бус“, „Вестор транс“ и „Радос компани“ вчера соопштија дека на дневно ниво во Скопје недостигаат меѓу 160 и 200 автобуси за да биде во целост исполнет зимскиот возен ред.

„Приватните превозници не можат да одговорат на зададениот возен ред поради следниве причини: ненамирен долг од јуни, немаме верификувани извештаи за месеците јули, август, септември и октомври, ниска цена за изминат километар, со која не можеме да ги покриеме основните трошоци“, се наведува во соопштението.

БЈН: Градот избрал неприфатлива понуда

Од Бирото за јавни набавки денеска информираат дека постапката за јавна набавка на Еуродизел, објавена од страна на договорниот орган ЈСП била предмет на управна контрола по сила на закон затоа што сите постапки за јавни набавки на стоки и услуги со вредност над 500.000 евра, се предмет на управна контрола без оглед на тоа кој договорен орган ги спроведува.

„Во однос на конкретната постапка, управната контрола најде дека договорниот орган ЈСП избрал неприфатлива понуда за најповолна. Оваа понуда, која била и единствена поднесена понуда во постапката, не исполнува услов кој самиот ЈСП го навел во точка 1.4.8 од тендерската документација. Тоа всушност е наведено и во самиот извештај од спроведена постапка на комисијата за јавна набавка во ЈСП“, стои во соопштението од Бирото за јавни набавки.

Управната контрола притоа, дала инструкции комисијата за јавна набавка да ја стави вон сила донесената одлука за избор и да донесе одлука за поништување на постапката.

„Напомнуваме дека ЈСП не ја искористил ниту можноста да ги оспори инструкциите на Бирото преку механизмите што му стојат на располагање во законот, од едноставна причина што станува збор за правилно утврдена фактичка состојба од страна на Бирото и исход на постапката кој не може да биде поинаков, а да биде согласно законот“, наведуваат од Бирото.

Ставовите искажани во денешното соопштение од Градот Скопје со кои се прави обид фокусот од лошо спроведената постапка да се прекрие со клевети од типот „кадарот на шефот на ВМРО во Бирото за јавни набавки“, Бирото за јавни набавки ги отфрла во целост и ги нарекува непримерни и непрофесионални.

„Бирото за јавни набавки постапува професионално, без оглед на дневните политички обвинувања, а наместо да шири политикантство, Градот Скопје навремено треба да реагира и да ги искористи законските можности кои му стојат на располагање да се задоволат итните потреби за гориво до завршување на редовната постапка. За секој проблем има решение, само што Градот треба да има волја и знаење да го најде, наместо да бара дежурни виновници кај другите за проблемите кои самиот ги создава“, соопшти Бирото за јавни набавки.

Студентите најавија протест за утре

Универзитетското студентско собрание при Универзитетот „Св. Кирил и Методиј“ вчера испрати ултиматум до ЈСП и до скопската градоначалничка Данела Арсовска, во кој се наведува дека ќе чекаат до крајот на денешниот ден градскиот превоз да се нормализира, а ако не се случи тоа, утре ќе протестираат.

Во претходниот период студентското собрание ги анкетираше своите членови. Резултатите покажуваат дека над 93 отсто од анкетираните се незадоволни од ЈСП.

„Спроведовме анкета во која учествуваа над 3.150 студенти. Од нив, 84 отсто изјавија дека во последните денови чекаат автобус повеќе од 15 минути, а 65,9 отсто чекаат над 20 минути. Дополнително, 93,4 отсто од студентите не се задоволни од квалитетот на јавниот превоз, а 65,9 отсто од нив го оценуваат како катастрофален“, се наведува во реакцијата на студентите.

Вчера опозициската СДСМ побара вонредна седница на градскиот совет за надминување на проблемите со превозот.

„Доколку и овој обид за заедничка акција биде опструиран, ќе го преиспитаме нашето учество во Советот, бидејќи нема да бидеме параван за лошите политики што го уништуваат нашиот град“, соопшти партискиот лидер Венко Филипче.

Претседателот на градскиот совет Трајко Славески синоќа објави дека е закажа седница на Советот за денеска во 18 часот.

Текстот е ажуриран со соопштението од Бирото за јавни набавки