ЈСП ита кон климатските цели со автобуси постари и од 30 години

Во следната деценија јавниот транспорт во Лондон целосно ќе се електрифицира. Според плановите, низ градот ќе циркулираат околу 9.000 автобуси со нулта емисија.

ТФЛ (Transport for London), државното претпријатие што покрива најголем дел од јавниот превоз во британската метропола, во март 2021 година имало 485 електрични автобуси. Во моментов нивниот број изнесува 1.600. Целта на компанијата е до следната година возниот парк да има 2.500 електрични автобуси.

Еден од другите оператори, „Стејџкоуч“, до крајот на оваа финансиска година ќе има околу 350 електрични автобуси, во споредба со само 78 на крајот на 2023 година.

Властите во Лондон забрзано влегуваат во инвестиции за електрифицирање на јавниот превоз поради моменталните услови на пазарот - евтината струја, пониските трошоци за одржување и намалените цени на батериите.

Бројот на исправни автобуси дневно во просек се намалил за 11,2 отсто

Возилата од јавниот транспорт и јавниот сектор во земјава уште минатата година требаше да почнат да трошат биогорива (пет отсто од вкупната потрошувачка) за намалување на емисиите на стакленички гасови.

Според законот што требаше да ја регулира материјата, јавниот транспорт требаше да почне транзиција кон биогорива, а нивниот удел во вкупната потрошувачка годинава требаше да стигне до 10 отсто, а до 2028 година да изнесува 30 отсто.

Наместо тоа, јавниот превоз во Скопје е најголем загадувач на воздухот во градот, особено во зимските месеци. Главна причина за тоа се староста на автобусите и ниските еколошки стандарди.

Просечната старост на автобусите во првата половина од годинава изнесувала 12,55 години, што е за 8,0 отсто повеќе во однос на истиот период во 2023 година (11,54 години).

Според последниот објавен извештај на Јавното сообраќајно претпријатие (ЈСП) за периодот јануари-јуни годинава, градот го покриваат 356 автобуси (плус еден што е наменет за туристичко разгледување на градот). Најголем број од нив, 213, се со еколошки стандард 5, додека 33 автобуси се со стандард 6.

Најголем број од автобусите во градот просечно трошат над 42,24 литри нафта за поминати сто километри. Најчестите автобуси по скопските улици, „јутонг“, трошат гориво над просекот - 43,35 литри на сто километри. Во текот на јануари и јуни потрошувачката надминувала 45 литри за сто километри.

Од 1 септември, со почетокот на учебната година, се виде вистинската состојба во која се наоѓа ЈСП - метежот е поголем, чекањето подолго трае, нервозата е на максимум.

Според податоците на претпријатието, бројот на исправни автобуси во просек дневно е намален за 11,2 отсто, во работни денови овој процент во просек изнесува 8.8 отсто на дневно ниво.

Извештајот уште покажува дека во првите шест месеци од 2024 година бројот на патници се намалил за 21,8 отсто, а бројот на поминати километри се намалил за 12,1 отсто.

Се влошува и финансиската состојба во ЈСП. Заклучно со јуни годинава приходите се намалиле за 4,7 отсто, а расходите се зголемиле за седум отсто во однос на истиот период лани.

Струмица се електрифицира

Состојбата во градскиот превоз во Скопје во текот првите месеци од втората половина од годината дополнително е влошена. Дневно во сообраќај беа пуштани од 190 до 200 автобуси, а и зимскиот и летниот возен ред се правени за да бидат опслужувани од околу 350 автобуси.

Набавката на нови автобуси за градот Скопје е заглавена во политички лавиринт. Градоначалничката Данела Арсовска не може да ја обезбеди потребната поддршка од Советот на Град Скопје за набавка на нови 95 електрични автобуси.

Градот аплицираше за државна помош од парите од унгарскиот кредит што се наменети за развој на општините, но од Министерството за локална самоуправа велат дека јавниот повик не предвидува пари за јавните претпријатија, туку за подобрување на инфраструктурата.

Паралелно, општината Струмица е првата во земјава, но и во регионот, која обезбеди целосно електрифициран јавен превоз. За седум милиони евра се набавени десет автобуси што минатата недела почнаа да сообраќаат.

За употребата на овие автобуси е изградена и централна станица во чии рамки ќе се извршува и полнењето на автобусите. Планирано е воведување на пет автобуски линии. Автобусите се карактеризираат со литиум-јонска батерија, која има гаранција од осум години, и се произведени во Турција.